Өмнөд Солонгосын нийслэл Сөүлд 2081 онд гэхэд өвлийн улирал жилдээ 12 өдөр л үргэлжилдэг болно гэж саяхны шинэ судалгаагаар таамаглажээ. Харин эсрэгээрээ нохой гаслам халуун өдрүүд урт удаан үргэлжилдэг болох магадлалтай байна. Үүний үр дүнд солонгосчууд дөрвөн улирал үзэхээ болих бололтой.

Солонгосын цаг уурын газар "Уур амьсгалын өөрчлөлтийн атлас" нэртэй тайлангаа Даваа гаригт /2025.12.22/ танилцуулсан. Тус тайланд дурдсанаар хүлэмжийн хийн ялгарал болон чулуужсан түлшнээс хамааралтай байдал мэдэгдэхүйц буурахгүй л бол 21 дүгээр зууны эцэс гэхэд дөрвөн улирал гэж бараг байхгүй болох бололтой.

Өмнөд Солонгост халуун зуны улирал дунджаар 97 хоног үргэлжилдэг. Энэ нь 2000-2019 оны хоорондын мэдээлэлд үндэслэсэн тоо юм. Тэгвэл 2081-2100 он гэхэд зуны улирал бараг 169 хоног үргэлжилдэг болно гэж таамаглаж байна. Өвлийн улирал одоогоор 107 хоног орчим үргэлжилж байгаа ч багассаар багассаар ердөө 40 өдөр болж магадгүй юм.

Дээр дурдсанчлан, зөвхөн Сөүл хотод огцом өөрчлөлт ажиглагдаж, өвлийн улирал 102 хоногоос 12-хон хоног болж буурна. Харин 2020 он гарснаас хойш дунджаар 31 хоног үргэлжилж буй хэт халалт 2080-аад онд 103 хоног болж гурав дахин нэмэгдэх төлөвтэй байна. Зуны улиралд шөнөдөө хэт халахыг Сөүлийн халуун орны шөнө гэж нэрлэдэг. Ийм үед цельсийн 25 хэм дулаан байдаг нь хэвээр үргэлжилж, хугацаа нь 31 хоногоос 91 хоног болж өсөх нь.