Мэргэжлийн сүмогийн Хацү башёгийн банзүкэ буюу чансаа өчигдөр/2025.12.22/ гарчээ. Өнгөрсөн башёгийн түрүү бөх, Украины од Аонишики озэки цолтойгоо анхны башёдоо барилдах учиртай.

Өдгөө 21 настай түүний хувьд мэргэжлийн сүмод барилдаж эхлээд ердөө 14 башёгийн дараа дээд зиндаанд дэвшсэн нь түүхэнд байгаагүй амжилт билээ. Одоо түүний зорилго нь ёкозүна болох гэнэ.

Энэ талаар тэрбээр ярихдаа "Сүмогийн үзүүлэн тоглолтын эхний өдөр озэки гэж дуудуулахдаа баяртай байсан. Өмнөхөөсөө ч илүү уухай, дэмжигчдийн хоолойг сонссон. Гэхдээ миний зорилго бол нэг цол илүү ахих. Би ирэх жилийг 2025 оноос дордуулмааргүй байна. Дахин цом хүртэж, ёкозүна болохын төлөө шаргуу хөдөлмөрлөнө. Барилдаандаа би итгэл дүүрэн байгаа. Үүнийгээ ч өөрчлөх шаардлагагүй" гэжээ.

Орос улс Украин руу халдан довтолсоны дараа Аонишики гэр бүлийн хамтаар Герман руу дүрвэж, 2022 оны дөрөвдүгээр сард Японд ирсэн билээ. Улмаар 2023 оны есдүгээр сард мэргэжлийн сүмогийн анхны барилдаанаа хийсэн юм.

Аонишикигийн шүтээн нь Украины алдарт боксчин Олександр Усик аж. Харин сүмо бөхчүүдээс Европын озэки Котоошү, Эстонийн Барүто, Гүржийн Точиношин, украин аавтай домогт ёкозүна Таихо нар гэнэ.

Нэгдүгээр сарын 11-нээс 25-ны өдөр хүртэл үргэлжлэхэд башёд нийтдээ 21 монгол бөх барилдана. Үүнээс дээд зиндаанд долоон бөх бий. Мэдээж ёкозүна Хошорюү С.Бямбасүрэн зүүний магнайд бөхчүүдээ манлайлна.

Монгол Улсын гарьд Д.Рагчаагийн хүү Асахакүрюү Р.Жамъянтогтох дээд зиндааны анхны башёдоо барилдах гэж байна.