НЭМЭЛТ: 

УИХ дахь Ардчилсан намын бүлгийн дарга О.ЦОГТГЭРЭЛ: 

-УИХ дахь Ардчилсан намын бүлэг улс төрийн нөхцөл байдалтай холбогдуулж, дэд сайдын асуудлыг хөндлөө. Засгийн газрыг огцруулах асуудлыг би өөрийн бланк дээр өргөн барина гэдгээ бүлгийн гишүүдэд танилцуулсан, дэмжсэн.

Ардчилсан намын бүлэг өнгөрсөн долоо хоногт дэд сайдаа буцаан татахгүй бол Ерөнхий сайдыг огцруулах шаардлага тавина гэдгээ мэдэгдсэн. Ерөнхий сайдын хувьд “Засгийн газрын тухай хуульд дэд сайд ажиллана” гэдэг зохицуулалт байгаа талаар тайлбар хэлнэ лээ.

Ардчилсан намын хувьд Засгийн эрхийг барьж байхдаа буюу 2015 оны арванхоёрдугаар сарын 30-нд Засгийн газрын тухай хуульд өөрчлөлт оруулж дэд сайдгүй ажиллана гэдэг шийдвэрийг гаргаж байсан. Гэтэл эрх баригч нам буюу МАН 2016 оны доллдугаар сарын 21-нд Засгийн газрын тухай хуульд өөрчлөлт оруулж, дэд сайдтай ажиллахаар болсон. Нэгэнт хуулиндаа Ардын нам дэд сайд гэж оруулсан бол өөрсдөө үүнийгээ өөрчилж, хасаж танах ажлаа хийх ёстой.

Ардчилсан намын бүлгийн хувьд тавьсан шаардлагаасаа буцахгүй, энэ долоо хоногт дэд сайдаа татахгүй бол Засгийн газрыг огцруулах бичгийг өргөн барина. 32-оор өргөн барихыг өнөөдөр гүйцээчихнэ.

Саяхан тангараг өргөж байхдаа сайн сайхан юм ярьж байсан сайд нар дэд сайдгүй ажиллаж чадахгүй гэж байгаа бол ажлаа өгөх хэрэгтэй. Ажлын ачааллал даахгүй гэж байгаа бол албан тушаалаасаа чөлөөлөгдөх ёстой.

2026 оны төсвийн тухай хуульд дэд сайд гэдэг орон тоо байхгүй, тэрийг дагасан цалин хангамж, төсөв тавиагүй.  Хэрвээ дэд сайд гэдэг албан тушаалтан сайдыг орлож ажиллах гэж байгаа бол Засгийн газрын тухай хуульд  дэд сайд нь сайдын ажлыг орлох зохицуулалт байдаггүй.  Жишээлбэл, УИХ-д Сангийн сайд төсөв танилцуулах болоход эзгүй бол дэд сайд танилцуулдаггүй, өөр сайд танилцуулдаг гэлээ.

Мөн өнөөдрөөс Төрийн ордны зүүн хаалган дээр иргэд жагсан, Засгийн газрыг огцруулахыг шаардаж эхэлсэн. Үүнтэй Ардчилсан намаас зохион байгуулаагүй, холбоогүй гэлээ.

АН-ын бүлэг дэд сайд нарын асуудлыг хэлэлцэнэ

УИХ дахь Ардчилсан намын бүлэг өнөөдөр үдээс өмнө хуралдана. Бүлгийн хуралдаанаар дэд сайд нарыг огцруулах асуудлаа дахин хэлэлцэх юм. Тус бүлгээс өнгөрсөн долоо хоногт хувийн хэвшлүүд татвараа төлж чадахгүйд хүрч хэдэн мянгаараа хаалгаа барьж байхад Засгийн газрыг данхайлган дэд сайд нарыг томилсон нь буруу хэмээн үзэж, огцруулах шаардлагыг Ерөнхий сайдад тавьсан. Ингэхдээ энэ шаардлагыг биелүүлэхгүй бол Засгийн газрыг огцруулах асуудлыг тавих болно” гэж мэдэгдсэн.

Харин Ерөнхий сайд Г.Занданшатар “Засгийн газрын тухай хуульд дэд сайдтай байж болно гэсэн заалт бий. Энэ асуудлыг УИХ-аар өөрчлөх боломжтой. Хуулийн төслийг өргөн барьж Засгийн газрын бүтцээс дэд сайдтай ажиллана гэдэг заалтыг хасах ёстой” гэх байр суурь илэрхийлсэн. Иймээс энэ асуудлыг УИХ дахь Ардчилсан намын бүлэг өнөөдөр хэлэлцэж шийдвэрээ гаргах юм.

Тодруулж хэлбэл, хуулийн төсөл өргөн барьж, дэд сайд наргүй ажиллах эрх зүйн орчин бүрдүүлэх үү, аль эсвэл нэр бүхий гишүүдийнхээ тавьж буй асуудлын хүрээнд шууд огцруулах асуудлаа өргөн барих уу гэдэг шийдвэрийн аль нэгийг нь гаргана гэсэн үг.

Г.ХОРОЛ