Нийслэлийн Засаг дарга бөгөөд Улаанбаатар хотын Захирагч Х.Нямбаатар түгжрэлийг бууруулах чиглэлээр авч хэрэгжүүлж буй бодлого, арга хэмжээ болон дулаан, эрчим хүчний салбарт хэрэгжиж буй томоохон төслүүдийн талаар өнгөрсөн Бямба гаригт мэдээлэл өгөв.

Тэрбээр нийслэл хотын тулгамдсан асуудал болоод буй авто замын түгжрэлийг үе шаттайгаар бууруулахад чиглэсэн шийдвэрүүдийг танилцуулж, ойрын жилүүдэд Улаанбаатар хотын түгжрэлийн нөхцөл байдал одоогийнхоос дордохгүй байх бодлогыг баримталж байгааг онцлов. Энэ хүрээнд хотын төвийн ачааллыг нэмэгдүүлэхүйц шийдвэрүүдийг хязгаарлаж, хот байгуулалтын бодлогыг чангатгаж эхэлснийг хэлсэн юм.

Тодруулбал, нийслэлийн төвийн зургаан дүүрэгт иргэдэд 0.07 га газрыг шинээр олгохгүй байх шийдвэр гаргасан бөгөөд хашаа тэлэх, гудамж сунган барихыг хориглосон байна. Энэ нь авто замын сүлжээнд нэмэлт дарамт үүсгэхээс сэргийлэх, хотын төвлөрлийг сааруулахад чиглэсэн арга хэмжээ гэдгийг Хотын дарга онцоллоо.

Мөн түгжрэл бодитоор буурч, замын хөдөлгөөний нөхцөл сайжрах хүртэл Улаанбаатар хотод шинээр автомашины улсын дугаар олгохгүй байх бодлого баримталж буйг мэдэгдэв. Харин хуучин автомашины дугааруудыг шилжүүлэн ашиглах, худалдан авах зохицуулалтыг хийж байгаа аж. Энэ нь хотын хэмжээнд автомашины тоо толгойг огцом нэмэгдүүлэхгүй байх, замын ачааллыг тогтворжуулах зорилготой юм.

Түгжрэлийг бууруулах томоохон дэд бүтцийн төслүүдийн нэг болох Туулын хурдны замын ажлын талаар тэрбээр “Туулын хурдны замын зорчих хөдөлгөөнийг 2027 оны Үндэсний их баяр наадмаас өмнө нээх шахуу төлөвлөгөөтэй ажиллаж байна. Энэхүү зам ашиглалтад орсноор Улаанбаатар хотын түгжрэл 15-20 орчим хувиар буурна” хэмээн мэдээлэв. Үүнээс гадна Тойрог хурдны замын төлөвлөлтийг хийж дууссан бөгөөд тус замыг барих гүйцэтгэгчийг сонгон шалгаруулах олон улсын нээлттэй тендерийг ирэх гуравдугаар сарын 1-нд зарлахаар бэлтгэж байгаа аж.

Нийтийн тээврийн шинэ шийдэл болох трамбай төслийн талаар ч тодорхой мэдээлэл өгсөн юм. Тэрбээр “Трамбай төслийн санхүүжилтийг нэгдүгээр сард багтаан босгохоор ажиллаж байна. Энэ төсөл хэрэгжсэнээр хотын нийтийн тээврийн шинэ соёл бүрдэж, замын ачаалал буурахад бодитой нөлөө үзүүлнэ” гэлээ.

Үргэлжлүүлэн Хотын дарга дулаан, эрчим хүчний салбарт хэрэгжүүлж буй томоохон ажлуудын талаар танилцуулсан юм. Тэрбээр нийслэлээс гаргасан санхүүгийн зохицуулалт, хөрөнгө оруулалтын үр дүнд энэ өвөл Улаанбаатар хотод эрчим хүчний хомсдол үүсэлгүй, тог тасралтгүй өвөлжиж байгааг онцлов. Үүний нэг илрэл нь дотоод бондын зөв менежмент гэдгийг дурдсан юм.

Тодруулбал, нийслэл 800 тэрбум төгрөгийн дотоод бонд гаргасан бөгөөд уг бондын эргэн төлөлт ирэх оны нэгдүгээр хагаст бүрэн дуусахаар төлөвлөгдсөн байна. Мөн Бөөрөлжүүтийн цахилгаан станцын төлбөрийг батлагдсан графикийн дагуу төлж байгаа бөгөөд 2027 оны зургаадугаар сарын 1-нд бүрэн төлж дуусах аж. “Бид санхүүгийн ийм арга хэрэгслүүдийг зөв ашиглаж, бодлоготой шийдвэрүүд гаргасны үр дүнд нийслэл хот энэ өвлийг эрчим хүчний доголдолгүй давж байна” хэмээн Хотын дарга онцоллоо.

Эрчим хүчний салбарт хотоос хийсэн хөрөнгө оруулалтын үр дүнд Бөөрөлжүүтийн 300 МВт-ын хүчин чадалтай эрчим хүчний станц бүрэн ашиглалтад орсон бол дотоод бондын хөрөнгөөр Багануурт 50 МВт-ын хүчин чадалтай станцыг маш богино хугацаанд барьж ашиглалтад оруулсан нь салбарын түүхэнд чухал алхам болсон гэдгийг дурдав.

Түүнчлэн Монгол Улс анх удаа Дулааны цахилгаан станц 5 (ДЦС-5) төслийг хэрэгжүүлэхээр ажиллаж байгаа бөгөөд уг станц 2027 онд ашиглалтад орохоор төлөвлөгдөж байна. Энэхүү томоохон төсөл хэрэгжсэнээр Улаанбаатар хотын баруун бүсийн орон сууцжилтыг нэмэгдүүлэх дулааны боломж, нөхцөл бүрдэхээс гадна нийслэлийн цахилгаан хангамж илүү найдвартай, тогтвортой том эх үүсвэртэй болох юм.