Хоёр Солонгосын хилийн бүсэд барилгын ажил хийж буй хойд солонгос цэргүүд өнгөрсөн сард хатуу бэхлэлттэй хуурай замын хилийг 10 удаа зөрчжээ. Харин гуравдугаар сараас хойш нийт 16 удаа зөрчөөд байгааг Өмнөдийн Штабын дарга нарын нэгдсэн хороо мэдээллээ.

Арваннэгдүгээр сард бүртгэгдсэн тохиолдлуудын дийлэнх нь зүүн эргийн Госон мужид байсан. Тодруулбал, Госон мужид зургаан тохиолдол, Кёнги мужийн Ёнчон хотод гурван тохиолдол, Канвон мужийн Хванчон хотод нэг тохиолдол тус тус бүртгэгджээ. Госон мужаар дамжин хил зөрчихийг оролдсон нь газар зүйн онцлогтой холбоотой аж.

Хил зөрчсөн тохиолдол бүрт Өмнөд Солонгосын арми тогтоосон журмын дагуу анхааруулах мессеж цацаж, зарим нэг тохиолдолд нь анхааруулах буудлага хийсэн байна. Саатуулах оролдлого бүр амжилттай болж хойд солонгос цэргүүд хил давалгүй ухарсан аж.

Хойд Солонгосын удирдагч Ким Жон Ун 2023 оны сүүлээр Солонгосын хоорондох харилцааг бие биедээ дайсагнасан хоёр улсын хоорондын харилцаа гэж тодорхойлсон. Үүнийг дагалдаад хилийн дагуу мина тавих, танк эсэргүүцэгч хаалт босгох, өргөст торон хашаа барих зэрэг янз бүрийн эсэргүүцлийн арга хэмжээ авсан билээ. Харин Өмнөдийн ерөнхийлөгч Ли Жэ Мёны хувьд зургадугаар сард албан тушаалаа авснаас хойш хоёр Солонгосын харилцааг энх тайванчаар шийдэхийг оролдож байна. Тэрбээр хоёр Солонгос хооронд хэлэлцээр хийх анхны албан ёсны саналыг тавиад буй. Гэвч үүнд Хойд Солонгосын тал шийдтэй хариу өгөөгүй хэвээр байна.