Эдийн засаг хямралтай байгаа ч монголчууд уламжлалт баяр ёслолоо өргөн дэлгэр тэмдэглэдгээрээ тэмдэглэнэ. Шинэ жилийн баяраар хамгийн их орлоготой ажилладаг хүмүүс бол урлагийнхан. Эрэлт ихсэхийн хэрээр тэдний үнэ хөлс ч өсдөг. Баярын өдрүүдэд тайзан дээр гарч, хоёроос гурван дуу дуулаад нэг өрөө байрны мөнгөтэй дүйцэхүйц хэмжээний мөнгө халаасладаг нь нууц биш. Үүний хажуугаар танил талаараа уран бүтээлчдийг баяртаа урьж, дуулах нь ч бий. Ингээд шинэ жилийн баяраар Монголын рок попын урлагийн одод ямар үнээр байгууллага, хамт олны баярын арга хэмжээг хөтөлж, дуулах талаар мэдээллийг бэлтгэн хүргэе.

Энэ жил баярын арга хэмжээ хөтлөх хөтлөгч, хамтлаг, дуучдын үнэ өмнөх жилүүдийнхээс 1-1.5 сая төгрөгөөр буурчээ.

Хамт олны шинэ жилийн арга хэмжээнд хамтлаг дуучдаас дутахааргүй өндөр хөлстэй "үйлчилдэг" хүмүүс бол хөтлөгчид. Олны танил жүжигчид, хөтлөгчид баярын арга хэмжээг 1.5-5 сая төгрөгөөр хөтлөх аж. Мөн олонд танигдаагүй хөтлөгчид 1.5-3 сая төгрөгөөр танай хамт олны үйл ажиллагааг хөтөлж байна. Харин рок поп урлагийн "акул"-ууд өмнөх жилийнхээ тогтсон үнээр байгууллага, хамт олны баярын тайзнаа дуулах нь ээ.

Жишээлбэл, хамгийн эрэлт ихтэй хөтлөгчдийн нэг жүжигчин Э.Ууганбаяр энэ жилийн арга хэмжээг таван сая төгрөгөөр хөтлөх гэнэ.

Түүний дараагаар жүжигчин Э.Цолмонбаяр, О.Тэмүүжин нар таван сая төгрөгийн үнээр хөтлөх бол “Яг түүн шиг” шоуны хөтлөгч Б.Болд дөрвөн сая төгрөгөөр хамт олны баярын өдрийг хөгжөөж, хөтөлж байна. Мөн хошин урлагийн жүжигчин Т.Бархүү, "Фантастик" продакшны жүжигчин Ж.Алтаншагай таван сая төгрөгөөр хөтлөгч хийж байгаа аж. Сүүлийн үед жүжигчдээс гадна телевизийн эмэгтэй хөтлөгчид эрэлт ихтэй болсон.

"Од" болж буй реппер "Tunderz" гэхэд дөрвөн сая төгрөгөөр дуулах бол дуучин Ц.Мөнхбаяр буюу Серёжа гэхэд мөн л 2-3 дууг дөрвөн саяар дуулах гэнэ. Мөн "Дижитал" хамтлагийн дуучин Г.Эрдэнэбилэг буюу Эрка, Наагий нар 2-3 дууг дөрвөн саяар дуулна. Харин поп дива Гавьяат жүжигчин, дуучин Т.Ариунаа, Б.Сарантуяа нар таван сая төгрөгөөр дуулах бол дуучин Т.Дэлгэрмөрөн, А.Хаянхярваа нар хамтран зургаан сая төгрөгөөр дуулах гэнэ. "Харанга" хамтлагийн дуучин Х.Лхагвасүрэн 4-4.5 сая төгрөгөөр дуулах нь ээ.

Өвлийн өвгөн, цасан охинтойгоо баярын арга хэмжээг "чимэх" үнэ нь 1-1.5 сая төгрөг. Баярын карнавал, циркийн үзүүлбэр 600-800 мянган төгрөгийн үнэтэй.

Хамгийн үнэтэй дуучны тоонд ордог, Төрийн соёрхолт, дуучин Д.Болд 3-6 сая төгрөгөөр дуулах гэнэ. Монголын рок попын ертөнц дэх хамгийн эрэлттэй эмэгтэй уран бүтээлч бол яах аргагүй “Киви” хамтлагийн ахлагч, дуучин Ука. Содон стиль имиж, эрч хүчээр дүүрэн түүнгүй арга хэмжээ, шоу тоглолт гэж байхгүй болсон. Тэрбээр шинэ жилийн баяраар хоёроос гурван дууг өнгөрсөн жил 4-4.5 сая төгрөгийн үнэтэй дуулах гэнэ. Шоуны шилдэг оролцогч, ковер дуучдын хувьд 1-2 сая төгрөгөөр дуулна. Харин дуучин П.Баярцэнгэл, Наки, Б.Амархүү нар гурван саяар дуулах бол эмэгтэй дуучдаас Б.Эгшиглэн, М.Үүрцайх, Э.Агиймаа, Ч.Мишээл нар хоёр сая төгрөгөөр баярын арга хэмжээнд дуулна.

Рок попын "акул"-ууд гэгддэг "Хурд" хамтлагийнхан энэ жил тогтсон үнээрээ буюу 30 минутын тоглолт нь 18-20 сая төгрөгөөр дуулах бол "Никитон" хамтлаг 12 сая төгрөгөөр хамт олны баяр дээр баяр нэмж, ая дуугаа өргөх нь ээ. Харин хип хоп хамтлагаас "Люмино"-гийнхон таван сая төгрөг, "Татар" хамтлаг 4.5-5 сая төгрөгөөр дуулах гэнэ. Мөн "Гурван охин", "Sweetmotion", "Киви" зэрэг охидын хамтлагийн зургаан сая төгрөгөөр дуулах юм байна. Харин амьд хөгжмийн "Люмонс" зэрэг хамтлагууд гурван сая төгрөгөөр дуулах юм байна.