Оросын шүүх дэлхийн уул уурхай, металлын компани болох Рио Тинтогийн эсрэг гаргасан 104.75 тэрбум рубль буюу 1.32 тэрбум ам.долларын нэхэмжлэлийг Русалын талд шийдвэрлэсэн гэж шүүхийн баримт бичигт дурджээ. Гэсэн хэдий ч шүүхийн шийдвэр гарснаар хууль эрх зүйн маргаан улам хурцадсан бололтой. Уг маргаан нь Австралийн Квийнслэнд мужид байрлах хамтарсан эзэмшлийн хөнгөн цагааны исэл боловсруулах үйлдвэртэй холбоотой юм.

ОХУ 2022 онд Украинд бүрэн хэмжээний дайралтаа эхлүүлснээс хойш барууны улс орнууд Москвагийн бүх үйл ажиллагаанд хориг тавьсан. Австрали улс ч мөн адил Орост хориг тавьсан юм. Улмаар Русал компани хоригийн улмаас Рио Тинтотой хамтран эзэмшиж байсан хөнгөн цагааны исэл боловсруулах үйлдвэрийн ямар ч үйл ажиллагаанд оролцох боломжгүй болсон. Ингэснээр Рио Тинто Австралийн Квийнслэнд мужид байрлах боловсруулах үйлдвэрийг 100 хувь хяналтдаа авсан байна. Шүүхийн нэхэмжлэлийг хаалттай хэлэлцсэн бөгөөд дэлгэрэнгүй мэдээллийг нь мэдээлээгүй байна. Русал болон Рио Тинто мэдээлэл өгөөгүй байгаа юм.

Русал нь анхдагч үйлдвэрлэлийн гарцаараа дэлхийд хоёрдугаарт ордог хөнгөн цагааны компани юм. Тус компани 2024 онд Австралийн шүүхэд Квийнслэндийн хөнгөн цагааны үйлдвэр болох Квийнслэндийн Алюмина ХХК (QAL)-ын 20 хувийн хувьцааны эрхээ сэргээхийн тулд нэхэмжлэл гаргасан. Гэвч тус улсын шүүх хэргийг нь Рио Тинтогийн талд шийдвэрлэсэн байдаг. Австрали улс 2022 онд Украинд Орос улс цэргийн ажиллагаа эхлүүлсний хариуд өргөн хүрээтэй хориг арга хэмжээ авсан. Үүнд хөнгөн цагааны түүхий эдийг Орос руу экспортлохыг хориглосон явдал багтсан юм.

Австрали 2022 оны гуравдугаар сард хориг тавьсны дараахан Рио Тинто компани "QAL"-ийг дангаар нь хяналтдаа авч, Русалыг түлхэн унагаж, боловсруулах үйлдвэрийн бүтээгдэхүүнд нэвтрэх эрхийг нь хязгаарласан.

Үүнээс өмнө нь Рио Тинто боловсруулах үйлдвэрийн 80 хувийг эзэмшдэг байжээ. Рио Тинто Орос улсад ямар ч хөрөнгө эзэмшдэггүй. Гэсэн хэдий ч Русалын шүүхэд өгсөн нэхэмжлэлд Рио Тинтогийн зарим охин компанийг ч мөн яллагдагчаар татсан байжээ. Уг охин компани нь  Монгол дахь Оюу Толгой зэс-алтны уурхайд 66 хувийг эзэмшдэг.

Товчхондоо, Русал нь Рио Тинтогийн Монгол дахь охин компаниудыг мөн адил шүүхэд өгсөн.

Австралийн хөнгөн цагааны экспортын хориг болон Украин дахь боловсруулах үйлдвэрийн үйл ажиллагаанд оролцох боломжгүй болсноор Русал 2022 онд Сибирийн хөнгөн цагаан хайлуулах үйлдвэрүүдээ хангахын тулд Хятад болон бусад орноос нэмэлт хангамж авах болжээ. Русал мөн энэ онд Энэтхэг байх хөнгөн цагааны үйлдвэрийн 50 хувь хүртэлх хувийг аажмаар эзэмших болно гэж мэдэгдсэн байна. Мөн 2028 онд Оросын Ленинград мужид 4.8 сая тонн хүчин чадалтай хөнгөн цагааны ислийн шинэ үйлдвэр барих төлөвлөгөөгөө зарласан. Русал 2023 онд Орос, Ирланд, Ямайка, Гвиней дэх хөрөнгөөсөө түүхий эдийг дэмжих зорилгоор Хятадын хөнгөн цагааны ислийн боловсруулах үйлдвэрийн 30 хувийн хувьцааг худалдаж авсан.