АНУ-ын ерөнхийлөгч Дональд Трамп Венесуэль рүү орж, гарч буй бүх нефть тээвэрлэгч хөлөг онгоцонд хориг тавьсан төдийгүй “бүх талын бүслэлт” хийхийг тушааснаа мэдэгдлээ. Тэрбээр энэ мэдэгдлээ "Truth Social" сүлжээнд нийтэлж, Венесуэлийн ерөнхийлөгч Николас Мадурогийн засгийн газрыг гадаадын террорист байгууллага хэмээн нэрлэсэн байна. Мөн терроризм, хар тамхины наймаа, хүний наймаа болон АНУ-ын хөрөнгийг хулгайлсан гэж буруутгав.

Трампын хэлснээр, Венесуэлийг одоо АНУ-ын асар том тэнгисийн цэргийн хүч бүсэлсэн бөгөөд цэргийн оролцоо цаашид улам нэмэгдэнэ гэж анхааруулжээ.

Энэхүү мэдэгдэл нь Венесуэлийн эргийн ойролцоо нэг нефть тээвэрлэгч хөлөг онгоцыг АНУ хураан авснаас хойш долоо хоногийн дараа гарсан байна. АНУ тус хөлгийг хууль бус нефть тээвэрлэлтэд оролцсон гэж үзэн, Америкийн боомт руу авч явж байгаагаа мэдэгдсэн. Харин Венесуэлийн засгийн газар үүнийг эрс эсэргүүцэж, АНУ-ыг хулгайлах гэмт хэрэг үйлдсэн, багийнхныг барьцаалсан хэмээн буруутгав.

Сүүлийн үед Трампын захиргаа Венесуэлийн нефть тээвэрлэсэн шинэ хөлгүүдэд хориг тавьсан төдийгүй Мадурогийн хамаатан садан, түүний засаг захиргаатай холбоотой бизнесүүдэд хориг ногдуулсан.

Мөн Карибын тэнгист батлан хамгаалах хөлөг онгоц, олон мянган цэрэг байршуулсан. Ялангуяа дэлхийн хамгийн том нисэх онгоц тээгч "USS Gerald Ford"-ыг Венесуэлийн ойролцоо байрлуулсан байна.  АНУ Венесуэлийг нефтийн орлогоо гэмт хэрэг, хар тамхины наймаанд ашигладаг гэж буруутгаж байгаа. Эсрэгээрээ Венесуэль улс нефть, баялгийг нь АНУ булаахыг завдаж байна гэж мэдэгдэж байна. Хоёр улсын харилцаа олон жилийн турш хурцадмал байсаар ирсэн бөгөөд АНУ Мадурогийн засаглалыг удаан хугацаанд эсэргүүцэж ирсэн юм.