"Friends" цувралын алдарт од Мэттью Перрид кетамин борлуулсан Калифорнийн эмч найман сар хоригдох ял авлаа. Мөн гурван жилийн хугацаатай тэнсэн харгалзах, 300 цаг олон нийтийн сайн дурын ажил хийх ялаар шийтгэсэн байна. Ингэснээр мансууруулах бодис хэтрүүлэн хэрэглэсний улмаас нас барсан жүжигчний үхлээс шалтгаалсан хэрэгт яллагдсан хүний тоо хоёр болов. Доктор Марк Чавес нь 2023 онд Лос Анжелес дахь гэртээ нас барсан жүжигчний үхэлтэй холбоотой хар тамхины хэрэгт буруугаа хүлээсэн таван хүний нэг юм. Тухайн хүмүүс дунд өөр нэг эмч болон “Кетамины хатан хаан” хэмээн нэрлэгддэг наймаачин багтжээ.

Сан Диегод ажиллаж байсан эмч Чавес кетаминыг эмнэлэг болон бөөний худалдаа эрхлэгчээс хуурамч жор ашиглан олж авсан байна.

Мөн өөр нэг эмч болох Сальвадор Пласенсиад худалдсан гэдгээ хүлээн зөвшөөрчээ. Харин Пласенсиа уг кетаминыг Мэттью Перрид нийлүүлдэг байсан. Пласенсиад энэ сарын эхээр 30 сарын хорих ял оноосон юм.

Перригийн үхэлтэй холбоотой хоёр жилийн турш үргэлжилсэн холбооны мөрдөн шалгалтаар түүнийг Холливудад үйл ажиллагаа явуулдаг хууль бус далд сүлжээгээр хэрхэн кетамин олж авч байсан нь тогтоогдсон. Кетамин нь мэс заслын үед хэрэглэдэг мэдээ алдуулагч бөгөөд сэтгэл гутрал, сэтгэлийн түгшүүр, өвдөлт намдаах эмчилгээнд ашиглагддаг. Мансууруулах бодисын донтолт, сэтгэл гутралын асуудалтай тэмцэж байсан Перрид кетаминыг эмчилгээний хүрээнд жороор бичиж өгдөг байсан. Гэвч тэрээр удалгүй заасан хэмжээнээс илүүг хайж эхэлсэн аж.

Улмаар жүжигчин Перри кетамин авах гэж хоёр эмч, хамт амьдарч байсан туслах, Эрик Флеминг хэмээх эр, мөн “Кетамины хатан хаан” гэгддэг Жасвин Сангха нарыг хамарсан хар тамхины сүлжээнд татагдан орсон байна. Сүүлд дурдсан гурван хүнд ойрын саруудад ял оноохоор төлөвлөж байгаа юм.

Перригийн задлан шинжилгээгээр түүний цусанд кетамины өндөр агууламж илэрсэн. Энэ нь түүний үхлийн шалтгаан болсон гэж тогтоогдсон байдаг. Прокуроруудын мэдээлснээр, Перригийн туслах Кеннет Ивамаса нь Чавес, Пласенсиа нартай хамтран жүжигчнийг нас барахаас өмнөх хэдэн долоо хоногийн хугацаанд 50 мянга гаруй ам.долларын кетаминаар хангаж байжээ. 2024 оны аравдугаар сард байгуулсан гэм буруугаа хүлээх хэлэлцээрийнхээ хүрээнд Чавес кетаминыг хуучин эмнэлгээсээ болон бөөний худалдаа эрхлэгчээс хуурамч жороор авснаа хүлээн зөвшөөрсөн байна.