“Эрэл групп”-ийн захирал Б.Эрдэнэбатын гэрт учир битүүлгээр амиа алдсан Филиппин улсын иргэн Террил Атиензагийн гэр бүл Улсын ерөнхий прокурорын газарт өнөөдөр /2025.12.16/ хандан, хэргийг сэргээн дахин шалгуулах хүсэлт өгсөн талаар мэдээлэл хийв.

Уг гэмт хэрэг нь 2011 оны арваннэгдүгээр сард болсон бөгөөд тухайн үед прокурорын байгууллагаас гэмт хэргийн шинжгүй гэж дүгнэн хэрэгсэхгүй болгожээ. Түүний ар гэрийнхэн энэ  хэргийг дахин сөхөж, хэргийг нягтлан шалгуулах хүсэлтийг өгөхөөр өчигдөр Монголд ирсэн.

Хохирогч эмэгтэйн том охин Найриел Аттиенза ”Монголын ард түмний тусламжтайгаар Монгол Улсад хүрэлцэн ирж, хэргийг дахин нээж шалгуулах хүсэлт тавих болсондоо маш их баяртай байгаа. Монголын эр зоригт сэтгүүлч С.Будрагчаагийн ачаар бид бүхэн ээжийнхээ хэргийг дахин шалгуулахаар боллоо. Хэдийгээр маш олон жил өнгөрсөн ч миний ээж шиг энгийн эгэл даруухан хүнд хүртэл шударга ёс үйлчлэх орон зай бий гэдэгт итгэж байна. Энэ хэргийг дахин сэргээж шалгуулах хүсэлт гаргаж байгаатай холбогдуулаад Монгол Улсын иргэн сэтгүүлч С.Будрагчаад аль 2011 онд шийдэгдэх ёстой байсан шударга ёсыг тогтоохын төлөө бидний нэрийн өмнөөс түүнд ар гэрийг бүрэн төлөөлөх эрхийг олгож байгаа. Хэдийгээр хууль эрх зүйн үйл явц нь ээдрээ төвөгтэй, маш хуучин хэрэг болохыг ойлгож байгаа. Гэхдээ ээж минь хүн байсан. Тийм учраас хүний ёсоор энэ хэрэгт хандахыг хүсэж байна.Энэ хэргийг Монголын ард түмэн мартаж болохгүй. Ээжийн минь нас барсантай холбоотой энэ хэргийг дахин сэргээж шалгахыг миний хувьд чин сэтгэлээсээ хүсэж байна. Түүний Монгол Улсад орж ирсэн нөхцөл байдал болон Д.Сэргэлэн гэж хүний удирдлага дор ажиллаж байсан. Хөдөлмөрийн харилцааг нь шалгуулахыг хүсэж байна. Мөн энэ хэрэгтэй холбоотой цагдаагийн бүх бүртгэл тухайн үед өгч байсан бүх хүмүүсийн мэдүүлэг болон бусад бичиг баримтыг дахин шалгах боломж олгохыг хүсэж байна. Монгол Улсын Засгийн газар энэ хэргийг зүгээр нэг архивт хадгалж үлдэх биш, шалгаж шийдвэрлүүлээсэй. Амьд хохирогчид болох гэр бүл нь зовж байгаа гэдгийг харгалзан хүлээн авч хүн ёсны шударга үнэнийг тогтооно гэж найдаж байна. Бид ээжийгээ буцааж авч амьдруулах боломжгүй ч та бүхний сэтгэлийн дэмээр тодорхой хэмжээнд амар амгалан байлгах нөхцөл бүрдэх байх гэж найдаж байна” гэв.

Тус хэргийг дахин шалгуулах хүсэлтийг тавьсан өмгөөлөгч, хуульч  Б.Пүрэвсүрэн “Хууль зүйн мэргэжлийн туслалцаа, өмгөөллийн үйлчилгээ үзүүлж байгаа хүний хувьд зарим асуудлыг ойлгуулах нь зөв байх. Өмгөөлөгчдийн багийн шийдвэр гарахаас өмнө хэвлэл мэдээллийн хэрэгслээр мэдээллүүд цацагдаж байна. Эрүүгийн хэргийг хаасан тогтоол байгаа. Тухайн тогтоолын хүрээнд хэрэгт цугларсан ач холбогдол бүхий баримт мэдээ матеиралтай танилцсаны үндсэн дээр хууль зүйн үндэслэл бүхий гомдлыг гаргадаг. Үүнийг Улсын ерөнхий прокурорын газар хүлээж авч байгаад туйлын талархалтай байна. Эхний ээлжид эрүүгийн хэргийг хэрэгсгэхгүй болгосон тогтоолтой танилцана. Түүний дараа хууль зүйн үндэслэл бүхий шаардлагатай нэмэлт баримт материал, нотлох баримтыг гаргана” гэлээ.

Н.ЦОЛМОНБААТАР