Европын удирдагч нар хэрэв Оростой гал зогсоох хэлэлцээ хийж, хүчин төгөлдөр болбол Украины аюулгүй байдлыг баталгаажуулах олон улсын хүчин байгуулах санал дэвшүүлэв. Энэ талаар Герман, Франц, Европын холбоо болон бусад орны удирдагч нар Даваа гаригт (2025.12.15) Берлинд хамтарсан мэдэгдэл гаргасан байна.

Мэдэгдэлд дурдсанаар, олон улсын хүчнийг Европ удирдаж, АНУ дэмжих болно.

Харин Европын тэргүүлсэн "Хүсэл зоригийн эвсэл"-ийн орнууд хувь нэмэр оруулна гэж онцолжээ. Түүнчлэн АНУ-ын тэргүүлсэн гал зогсоох хяналтын механизм байгуулж, ирээдүйд дахин зэвсэгт халдлага гарвал энх тайван, аюулгүй байдлыг сэргээх арга хэмжээ авах хууль эрх зүйн заавал биелүүлэх амлалт шаардаж байна. Мөн Украин улс энхийн цагт зэвсэгт хүчнээ 800 мянган цэрэгтэй байлгаж, мөргөлдөөнийг зогсоож, нутаг дэвсгэрээ хамгаалахад дэмжлэг авах болно.

Мэдэгдэлд "Энэхүү нутаг дэвсгэрийн талаарх шийдвэр нь Украины ард түмний төлөө бөгөөд бат бөх аюулгүй байдлын баталгааг үр дүнтэй хэрэгжүүлсний дараа хэрэгжинэ" гэжээ.

Украины ерөнхийлөгч Володимир Зеленский мөн тусгай элч Стив Виткофф зэрэг АНУ-ын албаныхантай ерөнхийлөгч Дональд Трампын боловсруулсан энхийн саналыг хэлэлцэхээр Берлинд айлчилсан. Хэлэлцээний дараа Зеленский АНУ-ын тал аюулгүй байдлын баталгааны талаар зөвшилцөлд хүрэхийг хичээж байна гэж бодож байгаагаа илэрхийлсэн байна. Гэсэн хэдий ч хоёр тал нутаг дэвсгэрийн асуудлаар өөр өөр байр суурьтай хэвээр байгаа бололтой.