Европын холбоо Оросын царцаасан хөрөнгийг тодорхойгүй хугацаагаар битүүмжлэх шийдвэр гаргасан гэж тус холбооны дипломат албаны тэргүүн Кая Каллас мэдэгдлээ. Хэрэв Орос Украинд учруулсан хохирлоо нөхөн төлөхгүй бол Европын холбооны нутаг дэвсгэрт байгаа 210 тэрбум еврогийн хөрөнгө царцсан хэвээр үлдэнэ гэж тэрбээр онцолсон байна. Европын комисс эдгээр хөрөнгийг ашиглан Украинд зээл олгох боломжийг хэлэлцэж байгаа бол Оросын Гадаад хэргийн яам үүнийг хууль бус, бодит байдалд нийцэхгүй хэмээн буруутгажээ.

Украинд дайн эхэлснээс хойш Европын холбоо болон "G7"-ийн орнууд Оросын ойролцоогоор 300 тэрбум еврогийн алт, валютын нөөцийг царцаасан. Үүний 200 тэрбум гаруй евро нь Европын холбоонд хадгалагдаж байна.

Оросын хөрөнгийг царцаах хугацааг тодорхойгүй болгох шийдвэр нь хөрөнгийн ихэнх нь хадгалагдаж буй Бельги улсыг дэмжихэд чиглэж байна. Мөн Украинд 2026–2027 онд цэрэг болон иргэний зардлыг санхүүжүүлэх зорилгоор 165 тэрбум еврогийн зээл олгох холбооны төлөвлөгөөг хэрэгжүүлэхэд чиглэж байгаа ажээ. "Reuters" агентлагийн мэдээлснээр, Украин улс зөвхөн Оросын удирдлага Киевт учруулсан их хэмжээний сүйрлийнхээ төлөө нөхөн төлбөр төлсөн тохиолдолд уг зээлийг эргэн төлөх үүрэг хүлээх юм.

Европын холбооны удирдагчид арванхоёрдугаар сарын 18-нд Брюссель хотод болох Европын Зөвлөлийн хуралдаанаар нөхөн төлбөрөөр баталгаажсан зээлийн үлдсэн нарийн ширийн зүйлсийг, мөн Оросоос хууль эрх зүйн арга хэмжээ авсан тохиолдолд Бельгийг хамгаалах баталгаануудыг эцэслэн шийдвэрлэхээр төлөвлөж байна. Үүний зэрэгцээ, ОХУ-ын Төв банк Баасан гаригт (2025.12.13) Бельгид төвтэй "Euroclear" компанийн эсрэг Москвагийн арбитрын шүүхэд нэхэмжлэл гаргаж, өөрийн царцаагдсан хөрөнгө болон үнэт цаасанд нэвтрэх боломжийг хууль бусаар хаасан гэж буруутгажээ.