АНУ-ын армийн мэдээлснээр Сирийн төв хэсэгт зэвсэгт этгээд халдлага үйлдсэний улмаас хоёр америк цэрэг болон иргэний орчуулагч нэг хүн амиа алдсан байна. АНУ-ын ерөнхийлөгч Дональд Трамп уг халдлагыг Исламын улс (ISIS) бүлэглэл үйлдсэн гэж мэдэгдэж, хариу арга хэмжээ авна гэдгээ амлав.

АНУ-ын Төв командлал (CENTCOM) болон Пентагоны албаныхан Бямба гаригт (2025.12.13)  энэ талаар мэдээлсэн. Тэдний хэлснээр уг хэрэг Палмира хотын орчимд терроризмын эсрэг ажиллагаанд дэмжлэг үзүүлж байх үеэр болсон байна. Мөн гурван хүн шархадсан бөгөөд халдлага үйлдсэн этгээдийг устгасан гэж мэдэгджээ.

Сирийн аюулгүй хүчнийхэн болон Америкийн цэргүүд хамтарсан хээрийн эргүүл хийж байх үедээ халдлагад өртсөн гэж Сирийн төрийн мэдлийн мэдээллийн агентлаг мэдээлсэн  байна. Тус агентлагийн мэдээлснээр, Сирийн хүчний хоёр албан хаагч шархаджээ. Ерөнхийлөгч Трамп сэтгүүлчдэд хэлэхдээ, “Энэ бол бид болон Сирийн эсрэг хийсэн ISIS-ийн халдлага” гэж мэдэгдээд,
“Бид заавал хариу арга хэмжээ авна” гэж онцлон тэмдэглэв.

АНУ 2024 онд Сирийн ерөнхийлөгч асан Башар аль-Асадын дэглэм нуран унасны дараа ч тус улсад цэргээ байлгаж, терроризмын эсрэг ажиллагааг үргэлжлүүлсээр байгаа юм. Сирийн түр засгийн газар "ISIS"-ийн эсрэг АНУ тэргүүтэй ажиллагаатай хамтран ажиллаж байна.