Өнгөрсөн онд “Eurovision” дууны тэмцээнд түрүүлсэн Швейцарын дуучин Немо ирэх оны дууны уралдаанд Израиль улсыг оролцуулахаар шийдсэнийг эсэргүүцэж байна. Улмаар тус тэмцээнээс хожсон цомоо буцаан өгөх болсноо мэдэгджээ.

Немо өөрийн цахим хуудсандаа, “Ноцтой хэрэгт буруутгагдаж буй улс өөрийн дүр төрөхийг сайжруулахын тулд энэ тэмцээнийг удаа дараа ашиглаж ирсэн тул би ийм шийдвэр гаргалаа” гэж бичжээ.

Тэрбээр мөн НҮБ-ын Хүний эрхийн зөвлөлийн мөрдөн шалгах комисс өмнө нь Израилийн эрх баригч болон аюулгүй байдлын хүчнүүдийг Газын зурваст геноцид үйлдсэн гэсэн дүгнэлт гаргасныг дурдсан байна.

“Eurovision” тэмцээнийг зохион байгуулагчид уг уралдааныг эв нэгдэл, хүртээмж, хүний нэр төрийг дээдэлдэг гэж тайлбарладаг. Гэвч Израилийг оролцуулж байгаа нь эдгээр үнэт зүйлс Европын өргөн нэвтрүүлгийн холбоо (EBU)-ны шийдвэртэй зөрчилдөж байна гэж Немо үзжээ. "EBU"-ийн гишүүд өнгөрсөн долоо хоногт Женев хотод хуралдаж, Израилийг тэмцээнд оролцуулах шийдвэр гаргасан байна. Үүний дараа Испани, Нидерланд, Ирланд, Словени, Исландын телевизийн сувгууд 2026 онд Вена хотод болох “Eurovision” дууны тэмцээнийг бойкотлохоор төлөвлөж буйгаа мэдэгджээ.