НҮБ-ын төв байранд Мягмар гаригт (2025.12.09) геноцидын гэмт хэргийн хохирогчдыг дурсах, тэдний нэр төрийг хамгаалах олон улсын өдрийг тохиолдуулсан хурал болжээ. Эл үеэр НҮБ дахь Хятадын байнгын төлөөлөгч түүхэнд бичигдсэн Японы харгис хэрцгий үйл явдлыг дурдаж, шүүмжилсэн байна.

Хятадын төлөөлөгч хэлэхдээ “Дэлхийн II дайнд олсон ялалтын үр дүн, Нюрнберг болон Токиогийн шүүхийн шийдвэрүүд хэзээ ч өөрчлөгдөхгүй” гэж мэдэгдсэн байна.

Нюрнбергийн шүүх болон Токиогийн шүүх нь Дэлхийн II дайны дараа байгуулагдсан олон улсын цэргийн шүүх юм. Энэ нь дайсагнагч орны удирдагчдыг дайны гэмт хэрэг, хүн төрөлхтний эсрэг гэмт хэрэг, энх тайвны эсрэг гэмт хэргээр яллаж шүүсэн. Нюрнбергийн шүүх нь Нацист Германыг, Токиогийн шүүх нь Японы Эзэнт гүрний дайны гэмт хэрэгтнүүдэд голлон хариуцлага тооцсон байдаг. Тус хоёр шүүхийн зорилго нь дайны үед үйлдэгдсэн аймшигт гэмт хэргийг буруутгаж, шударга ёсыг хангах, өндөр албан тушаалтнуудад хариуцлага тооцох зорилготой байсан бөгөөд цаашдын олон улсын шүүх, шударга ёсны механизмд суурь болсон чухал алхам байв.

Хятадын төлөөлөгч үг хэлсний дараа Японы НҮБ дэх төлөөлөгч хариулж, “Бүх улс орон өөрийн түүхийн өмнө даруухан байх ёстой. Япон улс өөрийн түүхтэй нүүр тулж ирсэн. Япон улс өнгөрсөн 80 жилийн турш энх тайвныг эрхэмлэж ирсэн" гэж мэдэгджээ.

Энэхүү маргаан нь өнгөрсөн сард Японы ерөнхий сайд Такаичи Санаэгийн Тайванийн талаар хэлсэн үгнээс хойш Япон, Хятад хоёрын харилцаа хурцдаж буй үед өрнөв. Такаичи парламентын хуралдаан дээр Тайванийн эсрэг хүч хэрэглэж болзошгүй ямар ч онцгой нөхцөл байдлыг Японы амьд үлдэхэд заналхийлж болох нөхцөл гэж үзнэ гэж мэдэгдсэн юм. Тэр цагаас хойш Хятадын НҮБ дэх төлөөлөгчийн газар Япон улсыг тасралтгүй шүүмжилж, Такаичигийн мэдэгдлийг буцаан татахыг шаардсан бичгийг дахин дахин хүргүүлсээр байна.