Газа дахь палестинчуудын шинэ аюул заналхийлэл нь Бырон шуурга болоод байна. Орон гэрээсээ дүрвэн, хоргодох байранд хоног төөрүүлж байсан хүмүүс үерийн улмаас дахин аюулгүй газар бараадах шаардлагатай болжээ. Хоргодох байруудыг түр зуур амьдарна гэж тооцоолон барьсан, зарим хүн майхан, эсвэл эвдэрч нурсан барилга дотор толгой хоргодож байгаа тул хүмүүсийн аюулгүй байдалд баталгаа болж чадахааргүй байна. Хүмүүс усан борооноор үерт автсан майхандаа гацсан байдалтай байна. Зарим хүн майхнаа тойруулаад борооны ус зайлуулах суваг шуудуу ухах арга хэмжээ авсныг бичлэгээс харах боломжтой.

Цаг агаарын хүнд нөхцөл байдал Баасан гариг хүртэл үргэлжлэхийг албаныхан анхааруулав. НҮБ-ын мэдээлснээр, 761 хоргодох байранд 850 мянга орчим хүн үерийн өндөр эрсдэлтэй байна.

Хариу арга хэмжээ авах тоног төхөөрөмж, техник хэрэгсэл дутмаг учир хүмүүнлэгийн багийнхан аврах ажиллагаа явуулахад хүндрэлтэй байгаа аж. Тусламжийн хэрэгслүүдийг Газын зурвас руу нэвтрүүлэх зөвшөөрөл өгөхийг хүмүүнлэгийн ажилчид Нетаньяхугийн засгийн газраас хүсч байна.

Үүний зэрэгцээ Израилийн тал Газа руу майхан оруулахыг хэдэн сараар хоригложээ. Зөвхөн брезент л оруулахыг зөвшөөрсөн тул хүмүүс түүгээр нь хоргодох байр маягийн зүйл барьж амьдарч байгаа аж. Эвдэрч сүйдсэн барилгуудад хүмүүс байрлаж байгаа ч гэлээ эдгээр нь бороо, салхины улмаас нурж унахад улам ойрхон болжээ.

Өдгөө Газын зурвасын 2.2 сая хүн ам газар нутгийн 43 хувьд шахцалдан байрлаж байна. Харин үлдсэн 57 хувь нь Израилийн армийн хяналтад байгаа бүс нутагт байрлаж байна.