Венесуэлийн эрэг орчимд байсан “Skipper” нэртэй нефт зөөвөрлөдөг танкерыг АНУ хураан авсан байна. АНУ-ын ерөнхийлөгч Дональд Трамп тус ажиллагааг баталж, маш сайн гэж сайшаажээ. Гэхдээ тэрбээр нарийн тайлбар өгөөгүй байна. Тус улсын Холбооны мөрдөх товчоо, Дотоодын аюулгүй байдлын хэлтэс болон Эргийн хамгаалалтын алба хамтран хураан авах ажиллагааг явуулсан. Энэ нь олон улсын усан хилд хохиролгүйгээр хийгдсэн.

АНУ-ын мэдээлснээр, “Skipper” танкер Венесуэлийн түүхий нефть тээвэрлэж байсан. Өмнө нь уг танкер Иран болон террорист байгууллагуудтай холбоотой хууль бус нефтийн сүлжээтэй холбогддог байсан.

АНУ-ын шүүх аль хэдийн хураан авах тушаал гаргасан байсан тул Лхагва гаригт (2025.12.10) хураан авах ажиллагаа явуулсан. Тус хөлөг Куба болон Азийн орнуудад нефт худалдахаар явж байсан гэж мэдэгдэв.

Венесуэлийн засгийн газар хураан авсан үйлдлийг эрс буруутгаж, үүнийг “олон улсын дээрэм” гэж мэдэгдсэн байна.

Мөн АНУ тэдний байгалийн баялаг, ялангуяа нефтийн төлөө дайрч байна гэж мэдэгдэв. Харин нефтийн импортоос ихээхэн хамааралтай Куба энэ талаар шууд хариу мэдэгдэл хийгээгүй байна. АНУ-ын явуулсан ажиллагаа нь Венесуэлийн удирдагч Николас Мадурод дарамт үзүүлэх томоохон кампанит ажлын нэг хэсэг гэж албаныхан тайлбарлаж байна. АНУ Карибын тэнгист цэрэг илгээх, мансууруулах бодис тээвэрлэж байгаа гэх сэжигтэй завинуудыг устгах зэрэг олон арга хэмжээ авч буй. АНУ цаашид ч иймэрхүү хураалт үргэлжлэх боломжтой гэж мэдэгдэж байна.