Хятадын Шанхай хотыг Японы баруун хэсгийн Осака, Кобэтэй холбодог гатлага онгоцны үйлчилгээг Бээжингийн хүсэлтээр түр зогсоожээ. Японы ерөнхий сайд Санаэ Такаичигийн Тайванийн талаарх мэдэгдлийн дараа Токио, Бээжингийн харилцаа хурцадсаар байгаагийн нэг илрэл нь энэ юм.

Осакад төвтэй "Jian Zhen Hao" гатлага онгоцны үйлчилгээ үзүүлэгч компанийн мэдээлснээр, түр зогсолт Бямба гаригаас /2025.12.16/ эхэлжээ. Хоёр улсын хоорондын аяллын аюулгүй байдлыг баталгаажуулах боломжгүй тул ийм шийдвэр гаргасан гэж Хятадын тал тайлбарласан байна. Үйлчилгээ хэзээнээс хэвийн байдалдаа орох нь тодорхойгүй гэдгийг оператор компани Даваа гаригт мэдэгдсэн. Мөн урьдчилан захиалсан байсан бүх тасалбарын буцаалтыг хийж байгаа аж.

Шанхайгаас Осака, Кобэ ордог уг үйлчилгээ Covid-19 цар тахалтай холбоотойгоор даруй таван жил тасалдсаны эцэст өнгөрсөн зургадугаар сард эргэн сэргээд байсан билээ.

Арваннэгдүгээр сарын 7-нд хэлсэн Такаичигийн үгнээс болж Хятад улс Японд үзүүлэх дарамт шахалтаа нэмэгдүүлсээр байна. Эргэн сануулахад, Такаичи тухайн үед мэдэгдэл хийхдээ "Хэрвээ Хятад улс Тайваньд халдан довтолбол энэ нь Японы оршин тогтнолд заналхийлж магадгүй. Иймд Японы Өөрийгөө хамгаалах хүчин хариу арга хэмжээ авах боломжтой" гэсэн юм.