Украины ерөнхийлөгч Володимир Зеленский Даваа гаригт (2025.12.08) Лондон хотноо Европын зарим удирдагчидтай уулзаж, хэлэлцээ хийжээ. Тэрбээр эл үеэр Оростой хийх энхийн хэлэлцээрт АНУ-ын хамтын ажиллагаа зайлшгүй шаардлагатай гэдгийг онцоллоо.

"Америкчуудгүйгээр бид зохицуулж чадахгүй зарим зүйл байгаа. Мөн Европгүйгээр бид зохицуулж чадахгүй зүйлс байгаа тул бид зарим чухал шийдвэрийг гаргах шаардлагатай байна" гэж Зеленский хэлжээ.

Их Британийн ерөнхий сайд Кир Стармер Зеленскийг Даунинг гудамжинд угтан авсан. Францын ерөнхийлөгч Эммануэль Макрон, Германы канцлер Фридрих Мерц нар мөн хэлэлцээнд оролцсон юм. Стармер хэлэлцээний үеэр Европ Украиныг дэмжиж байгааг дахин нотолсон байна. Стармер хэлэхдээ, "Маш удаан хугацаанд бидний баримталж ирсэн зарчим хэвээр байгаа. Бид Украиныг дэмжсэн хэвээр байна. Хэрэв гал зогсоох гэж байгаа бол энэ нь шударга бөгөөд удаан үргэлжлэх ёстой" гэж хэлэв. Тэд уулзалтын дэлгэрэнгүй мэдээллийг дэлгээгүй байна. Зеленский олон нийтийн мэдээллийн хэрэгслээр мэдэгдэхдээ, Европын удирдагчдад АНУ-тай хийсэн хэлэлцээ болон аюулгүй байдлын баталгаа зэрэг бусад сэдвээр мэдээлэл өгсөн гэжээ.

Зеленский өнгөрөгч Бямба гаригт (2025.12.06) АНУ-ын тусгай элч Стив Виткофф болон ерөнхийлөгч Дональд Трампын хүргэн Жаред Кушнер нартай утсаар ярьжээ. Тэд газар нутгийн асуудлыг хэлэлцсэн боловч Украин, Оросын хоорондох санал зөрөлдөөнийг намжааж чадаагүй гэж мэдээлж байна.