Их Британийн батлан хамгаалах дарга нар усан доорх кабель болон дамжуулах хоолойг хамгаалахад шаардлагатай технологийн олон сая ам.долларын төлөвлөгөөг боловсруулжээ.

Тодруулбал, стратегийн батлан хамгаалах тойм хөтөлбөрийн хүрээнд зарласан Атлантик Бастион хөтөлбөр буюу Атлантын бэхлэлт нь усан доорх байгууламжид учирч болзошгүй аюулыг тодорхойлж, хамгаалах зорилготой.

Үүний тулд бие даасан тээврийн хэрэгсэл болон хиймэл оюун ухааныг байлдааны хөлөг онгоц, нисэх онгоцтой нэгтгэх төлөвлөгөөг боловсруулжээ. Тус улсын Батлан хамгаалах яам уг хөтөлбөрийн "Оросын шумбагч онгоц болон усан доорх үйл ажиллагаа дахин сэргэсэнтэй шууд холбоотой" гэж мэдэгдэв. Энэ нь өнгөрсөн сард Их Британийн усан замын эргэн тойронд Янтарь гэх тагнуулын хөлөг онгоц үзэгдсэнтэй нягт холбоотой юм. Атлантын бэхлэлт хөтөлбөрт Их Британийн Батлан хамгаалах яам 18.6 сая ам.долларын хөрөнгө оруулалт татсан. Тиймээс ирэх жил гэхэд хэрэгжүүлэх боломжтой болно гэж албаныхан найдаж байна. Одоогийн байдлаар Их Британи болон Европын 26 компани уг төслийг хэрэгжүүлэх санал ирүүлжээ.

Өнгөрсөн долоо хоногт тус улсын батлан хамгаалахын сайд Жон Хийли Атлантын бэхлэлтийн нэг хэсэг болгон ашиглаж болох зарим хуучны технологийг судлахаар Портсмутын Тэнгисийн цэргийн баазад зочилсон.

Эл үеэр усан доорх "SG-1 Fathom", хүнгүй алсын удирдлагатай завь "Rattler", "Proteus" нэртэй бие даасан шумбагч онгоцны эсрэг нисдэг тэрэгний загвар, "Excalibur" нэртэй туршилтын шумбагч онгоц зэрэгтэй танилцжээ. Тэрбээр хэлэхдээ, "Дайснууд Их Британи болон холбоотнуудын өдөр тутмын амьдралд нэн шаардлагатай далай доорх дэд бүтцийг онилж байгаа гэдгийг хүмүүс ойлгох хэрэгтэй" гэж эл үеэр мэдэгдсэн байна. Мөн "Энэхүү шинэ аюул заналхийллийн эрин үе батлан ​​​​хамгаалахын шинэ эринийг шаардаж байгаа. Бид тулааны талбарт хязгаарлалт тогтоох хэрэгтэй тул дайны чадавхад хурдацтай шинэчлэл хийх ёстой" гэжээ. Атлантын бэхлэлтийн нээлт нь Даваа гаригт (2025.12.08) Лондонд болсон Олон улсын тэнгисийн хүчний бага хуралтай давхацсан юм.

Rattler нэртэй нисгэгчгүй тээврийн хэрэгсэл

SG-1 Fathom бол бие даасан шумбагч онгоц юм.

Портсмутын тэнгисийн цэргийн баазад Excalibur нэртэй туршилтын нисгэгчгүй шумбагч онгоцыг үзүүлж буй нь

Хааны тэнгисийн цэргийн багууд өндөр технологийн цэргийн техник хэрэгслийг хянаж байна.

Бага хурлын үеэр Их Британийн тэнгисийн цэргийн нэгдүгээр тэнгисийн лорд генерал Сэр Гвин Женкинс "SDR буюу Стратегийн батлан ​​​​хамгаалахын тоймд далайн бүс нутгийн аюулгүй байдал алдагдаж болзошгүйг тогтоосон. Далайн аюулгүй байдал нь Их Британийн хувьд стратегийн зайлшгүй шаардлага гэж тодорхойлогддог. Үйлдэл хийх цаг болжээ." гэж мэдэгдсэн байна.

Тэрбээр мөн "Энэ нь Оросын эсрэг усан доорх байлдааны орон зайг хамгаалах бидний зоримог шинэ арга барил болох Атлантын бэхлэлтээс эхэлнэ" гэж онцлон тэмдэглэсэн байна.

Түүнчлэн, Батлан ​​​​хамгаалах яамны хэвлэлийн төлөөлөгч хэлэхдээ, "Атлантын бэхлэлт нь хиймэл оюун ухаанаар ажилладаг акустик илрүүлэх технологиор холбогдсон хөлөг онгоц, шумбагч онгоц, нисэх онгоц, нисгэгчгүй хөлөг онгоцыг дижитал чиглүүлэх вэб сүлжээнд холбосон байх болно. Энэ нь дайсны аюул заналхийллийн эсрэг тулааны талбарт нэн шаардлагатай шийдвэрийг илүү хурдан гаргаж, хэрэгжүүлэх боломжийг олгодог зэвсгийн системийн анхдагч сүлжээ юм" гэж онцлон тэмдэглэжээ.

Их Британийн хамгаалахын хүсэж буй усан доорх дэд бүтэц нь тус улсын харилцаа холбооны амин чухал хэсэг юм. Мөн олон улсын харилцаа холбооны мэдээллийн 99 хувь болон цахилгаан, газрын тос, байгалийн хий зэрэг амин чухал эрчим хүчний хангамжийг дамжуулдаг. Үүнтэй холбоотойгоор, өнгөрөгч Пүрэв гаригт Их Британи, Норвеги улс тэнгисийн цэргийн хүчинд байлдааны хөлгийн нэгдсэн флотыг ажиллуулахыг зөвшөөрсөн батлан ​​​​хамгаалах гэрээнд гарын үсэг зурсан юм.  Энэхүү гэрээ нь далайн доорх чухал кабелийг хамгаалах зорилготой юм.