Хотын дарга Х.Нямбаатар Улаанбаатар хотын бохир усны шугам сүлжээтэй холбоотой мэдээлэл өглөө. Тэрбээр "Гачууртаас Төв цэвэрлэх байгууламж хүртэл үргэлжлэх “Туул-1” коллекторыг барих шийдвэр 2007 онд гарсан ч өнгөрсөн хугацаанд бодитой ахиц гараагүй байна. Харин энэ жилээс Ус сувгийн удирдах газар уг ажлыг бүрэн хариуцан гүйцэтгэж эхэлсэн.

Өмнөх жилүүдэд тавьсан зарим шугам өнөөдөр ашиглалтын шаардлага хангахгүй болсон талаар мэргэжлийн байгууллагууд мэдээлсэн. Тиймээс энэ нь коллекторыг бүхэлд нь шинэчлэх зайлшгүй шаардлагатай.

Энэхүү шугамыг шинэчлэн угсарч байж, өдөр ирэх тусам өргөжин тэлж буй нийслэлийн инженерийн дэд бүтцийн нэг томоохон асуудлыг шийдвэрлэх боломж бүрдэнэ. Хойд бүсийн гэр хорооллыг орон сууцжуулахад босоо шугамууд холбогдож, ариутгах татуургын саадгүй болох нөхцөл бүрдэнэ” хэмээн хэллээ.

Мөн "Улаанбаатар хот Мянганы сорилтын сангийн дэмжлэгтэйгээр ундны усныхаа асуудлыг бүрэн шийдсэн гэдгийг дурдан, “‘Туул-1’ коллекторыг 2028 он гэхэд барьж дуусгаснаар нийслэлийн бохирын шугамын асуудал бүрэн шийдэгдэнэ” гэж мэдэгдэв.