Тайванийн засгийн газар залилантай холбоотой асуудлаар эрх баригчидтай хамтран ажиллаагүй гэсэн шалтгаанаар Хятадын "RedNote" платформыг нэг жилийн хугацаагаар хаах тушаал гаргажээ. "RedNote" буюу "Xiaohongshu" платформ сүүлийн үед Тайваньд нэр хүнд нь нэлээн өссөн. 23 сая хүн амын гурван сая нь тус платформыг хэрэглэдэг гэх тооцоо ч бий. Нөгөөтэйгүүр "RedNote"-ийг Хятадын суртал ухуулгын хэлбэрээр ашиглаж магадгүй гэх болгоомжлол байдаг.

Тайванийн Дотоод хэргийн яам Пүрэв гаригт мэдэгдэл хийхдээ энэхүү хориг нь "RedNote" бидэнтэй хамтран ажиллахаас татгалзсантай холбоотой гэжээ. Цаашилбал, тус платформ нь 1700 гаруй залилангийн хэрэгтэй холбоотой гэв. Энэ нь 247.7 сая тайвань доллар буюу 7.9 сая ам.доллартай холбогдох хэрэг юм.

Гэхдээ хориг хэзээнээс хэрэгжиж эхлэх нь тодорхойгүй. Баасан гаригийн /2025.12.05/ үдийн хойно л гэхэд платформ Тайваньд хэвийн ажиллаж байжээ.

Дашрамд дурдахад, "RedNote"-ийг "ТикТок"-ийн гол өрсөлдөгч гэдэг бөгөөд платформын үндсэн хэв маяг нь "ТикТок", "Инстаграм"-ын хослол мэт харагддаг. "ТикТок" платформыг АНУ-д хориглох асуудал яригдсанаар тус платформын нэр хүнд, хэрэглээ улам өсчээ.