Өмнөд Африкийн ерөнхийлөгч асан Жейкоб Зумагийн охин Нкосазана Зума-Мнкубэ Оросын талд тулалдуулахаар 17 хүнийг хуурч илгээсэн гэж өөрийн эх өөртэй эгч Дудузиле Зума-Самбудлаг буруутгажээ. Тэдгээр 17 хүний бараг тал нь хамаатан садных нь хүмүүс байсан аж. Энэ нь Зумагийн гэр бүлийн холбоо харилцааг хурцадмал байдалд оруулж магадгүй байна.

Оросын арми хүн хүчний хомсдолд орсон тул африкчуудыг элсүүлэх нь нэмэгдсэн. Мөн ОХУ болон Африкийн Үндэсний конгрессын ахмад дайчдын хоорондын холбоо улам нягтарч буйг энэ үйл явдал онцолж байна.

83 настай Зума хэд хэдэн авлигын дуулианы дараа 2018 онд ерөнхийлөгчийн албан тушаалаасаа огцорсон. Улмаар 2024 онд удирдаж байсан намаасаа хөөгдсөн. Тэрбээр залуудаа ЗХУ-д цэргийн сургалтад хамрагдаж байжээ.

Буруутгагдаж буй охин Дудузиле Зума-Самбудла нь 43 настай. Тэрбээр Өмнөд Африкийн удирдагч асангийн 20 орчим хүүхдийн нэг бөгөөд Путиныг хүчтэй дэмжигч. Олон нийтийн мэдээллийн хэрэгслээр ч Путиныг дэмждэгээ ил тодоор илэрхийлж байсан удаатай. Өнгөрсөн долоо хоногт Нкосазана Зума-Мнкубэ түүний эсрэг гомдол гаргасны дараа Дудузиле Зума-Самбудла намаасаа огцорчээ.

Өмнөд Африкийн засгийн газар дайнд нэрвэгдсэн Донбасс мужид гацсан 17 иргэний хэргийг мөрдөн шалгах болсноос уг гомдол эхтэй. Тухайн 17 иргэн харьмаар байгаагаа хэлж ар гэр лүүгээ ярьснаар хэрэг явдал ил болжээ. Тэднийг ашигтай хөдөлмөрийн гэрээ нэрээр Орос руу илгээсэн гэж үзэж байна. Өмнөд Африкт засгийн газрын зөвшөөрөлгүйгээр гадаадын цэргийн албанд алба хаахыг хуулиар хориглосон байдаг.