НҮБ томоохон санхүүгийн хямралтай тулгарч байгаа тул 2026 оны төсөв болон ажилтны тоогоо эрс бууруулахаар болжээ. Тус байгууллагын ерөнхий нарийн бичгийн дарга Антонио Гутерреш мэдэгдэлдээ, гишүүн орнуудын 1.59 их наяд ам.долларын төлөгдөөгүй өр хуримтлагдсаны улмаас танах болсон гэж онцолсон байна.

Тодруулбал, 2026 оны төсвийг 15.1 хувиар бууруулж, 3.24 тэрбум ам.доллар байлгахаар болжээ.

Энэ нь 2025 оны төсвөөс 577 сая ам.доллараар бага байна. Дараа нь НҮБ харьяа агентлагуудаасаа 2681 орон тоог халах юм байна. Мөн улс төрийн тусгай үйл ажиллагааныхаа 21.6 хувийг зогсоох болжээ.

НҮБ-ын мэдэгдэлд тайлбарласнаар, АНУ, Хятад, ОХУ, Мексик зэрэг гишүүн орнууд гишүүнчлэлийн хувь нэмрээ оруулаагүй тул төсвийн таналт хийж байна.

Улмаар ажилтны орон тоог нөхөх боломжгүй болсон аж. Харин ерөнхий нарийн бичгийн дарга Гутерреш хоёр чухал үйл ажиллагааг төсвийн таналтаас чөлөөлнө гэдгийг мэдэгдсэн. Үүнд Газын зурвас дахь нэн шаардлагатай хүмүүнлэгийн тусламж үзүүлэх зорилготой "UNRWA" агентлаг, "Хөгжлийн данс ба Африкийн хөгжлийн төлөөх үйл ажиллагаа"-ны төсөв орж байна.

Шууд таналтуудаас гадна НҮБ мөнгө хэмнэх зорилгоор Нью-Йорк дахь ажлын байрны талбайгаа багасгаж байна. Тус байгууллага 2027 оны сүүл гэхэд өндөр үнэтэй хоёр оффисынхоо түрээсийг цуцлах төлөвлөгөөтэй байгаа. Ингэснээр 2029 оноос эхлэн жил бүр 24.5 сая ам.доллар хэмнэх боломжтой болох юм.