ОХУ-ын ерөнхийлөгч Владимир Путин Мягмар гаригт Москва хотноо Трампын төлөөлөгчидтэй энхийн хэлэлцээний асуудлаар уулзлаа. Таван цаг орчим үргэлжилсэн хэлэлцээ үр дүнтэй болсон ч Оросын талаас хүлээн зөвшөөрөөгүй зүйлс байгаа гэдгийг Кремлийн хэвлэлийн төлөөлөгч мэдэгдэв.

Путины ахлах зөвлөх Юрий Ушаков энэ талаар хэлэхдээ “Кремль зарим зүйл дээр санал нэгдсэн. Гэхдээ зарим зүйл дээр шүүмжлэлтэй байна. Зөвшилцөх хувилбар одоогоор гаргаж ирээгүй байна. Хийх зүйл их байна” гэжээ.

Путин Мягмар гаригийн өглөө /2025.12.02/ хэлэхдээ “АНУ-ын санаачилсан энхийн төлөвлөгөөнд Украин, Европын оруулсан өөрчлөлтүүдийг хүлээн зөвшөөрөхөөргүй байна. Хэрвээ Европ дайтмаар байгаа бол бид бэлэн” гэжээ.

АНУ-ын талаас Трампын тусгай элч төлөөлөгч Стив Виткофф болон Трампын хүргэн Жаред Кушнер нар хэлэлцээнд оролцсон. Тэд Москвагаас буцсан ч гэлээ хэлэлцээний талаар ямар нэг зүйл хараахан хэлээгүй байна. Зеленский тэднээс хэлэлцээний талаар мэдээлэл авахыг хүссэн гэх боловч Виткофф, Кушнер нар Киев юм уу Европын аль нэг нийслэлийг зорьсон эсэх нь тодорхойгүй. Энэ хэлэлцээнээс бүх зүйл хамаарна гэдгийг Зеленский өмнө нь мэдэгдэж байсан билээ.

Тэрбээр Даваа гаригт /2025.12.01/ Францын ерөнхийлөгч Эммануэль Макронтой уулзсан. Энэ үеэр Европын зарим удирдагч уулзалтад цахимаар оролцсон аж.