ОХУ-ын цэргийн командлагч нар тус улсын ерөнхийлөгч Владимир Путинд мэдээлэхдээ, Оросын хүчнийхэн Украины фронтын Покровск, Вовчанск хотуудыг эзэлж, бусад чиглэлд ч давшиж байна гэжээ. Путин үүнийг цаашдын давшилтад чухал амжилт хэмээн үнэлсэн гэж тус улсын хэвлэлд мэдээлж байна. Гэхдээ Украины тал эдгээр хотыг эзлэгдсэн эсэхийг батлаагүй. Оросын цэргийн командлалын мэдэгдэл нь Украины ерөнхийлөгч Володимир Зеленский Парис хотноо Европын удирдлагуудтай хийж буй уулзалтын үеэр гарч байна.

Оросын ерөнхий штабын дарга Валерий Герасимов Путинд мэдээлэхдээ, Оросын цэргүүд Покровск хотыг эзэлсэн гэж хэлсэн. Энэхүү хот Донецкоос баруун зүгт байдаг бөгөөд Оросын хүчин удаан хугацааны турш онилж байсан. Путин Даваа гаригт (2025.12.01) болсон уулзалтын үеэр “Энэ бол маш чухал чиглэл. Цэргийн онцгой ажиллагааны эхэнд тавьсан зорилтыг хэрэгжүүлэхэд тусална” гэж онцлон тэмдэглэсэн байна.

Мөн тэрбээр дараагийн зорилго бол Оросын цэргүүд “бүх чиглэлд ахиж", хил дагуу аюулгүй бүс байгуулах явдал гэж мэдэгджээ.

Герасимов болон бусад командлагч нар Донецк, Луганскийг бүхэлд нь эзлэх ажиллагааг үргэлжлүүлж буйгаа мэдэгдэв. "Telegram"-д байршуулсан видеонд Покровск хотод Оросын цэргүүд орж, сөнөсөн хороолол дундуур тугаа мандуулж буй нь харагдана. Үүнээс гадна, Харькив мужийн Вовчанск хотод  ширүүн тулалдаан үргэлжилсэн хэвээр байна. Гэхдээ Оросын тал уг хотыг эзэлсэн гэж мэдэгджээ. Мөн командлагч нар Путиний өмнө мэдэгдэхдээ, Покровск орчимд цэргүүд цэвэрлэгээний ажиллагаа явуулж байгаа бол Мырноград хотод тулалдаан үргэлжилж байна гэв. Мөн Запорожийн бүсийн өмнөд хэсэгт Гуляйпол болон Покровскийн хойд талын Лиман хот руу давшиж буй талаар мэдэгджээ.

Харин Украины Генштаб Даваа гаригт Покровск орчимд Орос 43 удаагийн дайралт хийсэн гэж мэдээлсэн. Сүүлийн үел Украин энэ чиглэлд байр сууриа хамгаалж, зарим газар ахиц гаргасан гэж мэдэгдэж байгаа юм. Мөн Украины командлагч Оросын өмнө нь зарласан Купянск хотыг бүрэн эзэлсэн гэх мэдээллийг баталгаагүй гэж үзэж буйгаа мэдэгджээ.