Японы поп дуучин Аюүми Хамасакигийн Шанхай дахь төлөвлөгөөт тоглолт Токио, Бээжингийн хурцадмал харилцаанаас болж цуцлагдсан билээ. Тоглолт өнгөрсөн Бямба гаригт /2025.11.29/ болох байсан ч зохион байгуулагчид Баасан гаригийн үдээс хойш цуцлах тухай мэдэгдлийг хийжээ. Цуцалж буй шалтгаанаа зохион байгуулагчид давагдашгүй хүчин зүйл гэж тайлбарласан байна.

Тоглолт гэнэт цуцлагдсан ч гэлээ 47 настай ж-поп од Шанхайд нэг ч үзэгчгүй цэнгэлдэх хүрээлэнд "I Am Ayu" тоглолтоо төлөвлөсөн ёсоор бүрэн хэмжээгээр нь хийлээ.

Аюүми Хамасаки тоглолт нь цуцлагдах тухай мэдэгдлийг Баасан гаригт л хүлээж авсан аж. Энэ тухайгаар тэрбээр англи, япон хэлээр цахим сүлжээндээ бичихдээ "Өмнөх тоглолтууд дээр бид өдөр шөнөгүй 200 хүнтэй баг ажилласан. Шанхайн тоглолтын тайзыг засч бэлдэхэд таван өдөр зарцуулсан. Гэвч өнөө өглөө багийн гишүүд тоглолт цуцлагдах тухай мэдэгдлийг хүлээн авлаа. Хамаг чадлаа дайчлан ажилласан 100 хятад ажилтан болон бусад 100 ажилтан, энэ тоглолтыг зорьж тэнгис далай гатлан Японоос ирсэн бүжигчид, уран бүтээлчдийн өмнөөс би гүнээ харамсаж байна. Хамгийн гол нь Хятад, Япон болон бусад орноос цугларсан шүтэн бишрэгчидтэйгээ уулзаж, уучлалт гуйх боломжгүйгээр тоглолт цуцлагдаж байгаад итгэж чадахгүй нь. Намайг үнэхээр уучлаарай" гэсэн юм.

Энэ асуудлыг Японы ерөнхий сайд Санаэ Такаичигийн мэдэгдэлтэй холбоотой гэж үзэж буй. Гэсэн ч Аюүми Хамасаки өөрийн сайн мэдэхгүй зүйлийн талаар ярихыг хүсэхгүй байгаагаа хэлсэн юм.

Аюүми Хамасаки нэг ч үзэгчгүй ч гэлээ тоглолтоо бүрэн эхээр нь толилуулсан гэдгээ цахим хуудсандаа бичиж, зурагнуудаа оруулжээ. Шанхай хотын оршин суугчид цэнгэлдэхийн гадаа түүний дуулах чимээ сонсогдож байгаа тухай хуваалцсан байна.

"14 мянган хоосон суудал. Гэсэн ч би дэлхийн өнцөг булан бүрээс ирсэн шүтэн бишрэгчдийнхээ хайрыг маш их мэдэрлээ. Энэ бол миний хувьд хамгийн мартагдашгүй тоглолтуудын нэг байлаа" гэж Хамасаки хэлжээ.

Түүний аялан тоглолтын дараагийн хуваарь 2026 оны нэгдүгээр сарын 10-нд Макаод байна. Тус тоглолтын тасалбарыг хэдийнэ худалдан авсан байгаа үзэгчид болж өнгөрсөн явдлын дараа тоглолт нь болох эсэхэд санаа зовниж байна.