Та тамхи татдаг уу, таны хажууд хэн нэгэн вейп татаж байна уу?

Ингэж асуухад бараг бүгд тийм гэж хариулахаар хэмжээнд бид электрон тамхинд орчихоод байна. Электрон тамхины тадаар НЭМҮТ-ийн дарга, анагаах ухааны доктор, дэд профессор Л.Баттөр "Бүх төрлийн тамхи хавдар үүсгэгч бодисуудыг агуулж байдаг. Цахилгаан тамхийг хор багатай, никотины агууламж багатай гэдэг. Гэтэл олон төрлийн химийн бодисуудаас гадна давтамж нь маш өндөр, 4-5 мянга хүртэл сорж байна" хэмээсэн юм. Ийм учраас электрон тамхийг 46 улс худалдаалахыг бүрэн хориглосон. Үүнд Норвеги, Сингапур, Тайланд, Малайз, Катар, Бразил зэрэг улс багтаж байна. Харин Африкийн ес, Латин Америкийн 10 улс манай манай улс шиг ямар нэгэн зохицуулалтгүйгээр энэ төрлийн тамхийг замбараагүй, хяналтгүйгээр хэрэглэж байгаа юм. Замбараагүй гэсний учир нь энэ төрлийн тамхины импорт таван жилийн дотор 175 дахин нэмэгджээ. 2025 оны байдлаар Австрали, Канад, Дани, Эстони, Герман, Шинэ Зеланд, АНУ, Филиппин, Саудын Араб улс электрон тамхины гаанаас бусад төрлийн амт, үнэрийг хорьсон бол Нидерланд, Булгар, Хятад, Финланд, Унгар, Латви, Литуан, Словен, Монтенегро зэрэг улс бүх төрлийн амт, үнэрийг хорьжээ. Ийнхүү зохицуулснаар улс орнууд өсвөр үе, залуучуудын дундах тамхидалтыг 10-35 хүртэл хувиар бууруулж чадсан аж.

ДЭМБ-ын Суурин төлөөлөгчийн газрын Халдварт бус өвчний урьдчилан сэргийлэлт, хяналтын асуудал хариуцсан мэргэжилтэн С.Болормаа "Электрон тамхины найрлагад хүний биед хортой, Олон улсын Хавдар судлалын агентлагаас албан ёсоор гаргаснаар анх хавдар үүсгэгч бодисууд, химийн хортой нэгдэл агуулагддагийг мэдэгдсэн. Энэ тамхи нь уушгины шинэ төрлийн өвчин үүсгэдэг.  Австралийн ЭМЯ-ны тайланд дурдсанаар хэдий бага насандаа электрон тамхинд орно, бусад мансууруулах, донтуулах хэрэглээнд орох эрсдэл гурав дахин нэмэгддэг" гэсэн юм.

2013 онд Л.Эрдэнэчимэг гишүүний санаачилсан Тамхины хяналтын тухай хууль маш сайн хууль байсан ч цаг үеийн нөхцөл байдлаас шалтгаалаад шинэчлэх зайлшгүй шаардлагатай тулгараад байна. Иймээс УИХ-ын гишүүн О.Номинчимэг тэргүүтэй гишүүд өмнөх хуульд тамхи гэж нэг л зүйл байсныг одоо шинээр үүсээд байгаа цахилгаан тамхи, халаагуур тамхи, шингэнээр ууршуулан татаж байгаа тамхийг, түүнтэй адилтгаж байгаа электрон тамхи гэх мэтийг хуулийн зохицуулалтад оруулж, Тамхины хяналтын тухай хуулийн шинэчилсэн найруулгын төслийг УИХ-д өргөн бариад байгаа юм. Хэдийгээр энэ бүхэн маш өндөр ашигтай тамхины бизнесийнхний эрх ашгийг ихээр хөндөж байгаа ч "Төгс бус зохицуулалт, өрсөлдөөнгүй зах зээлийн үр дүнд онцгой бүтээгдэхүүнээс огцом олох ашгийн төлөө ирээдүй хойч үеийнхээ эрүүл мэнд, амь насыг золиослож болохгүй. Нийгмийн эрүүл мэнд бол нэг хэсгийн бизнесийн орлогоос эрхэм зүйл юм" хэмээн УИХ-ын гишүүн О.Номинчимэг байр сууриа илэрхийлсэн юм.