АНУ, Украины төлөөлөгчид энхийн хэлэлцээний асуудлаар Ням гаригт /2025.11.30/ Флоридад уулзсан. Уулзалтад Украины талаас Үндэсний аюулгүйн зөвлөлийн нарийн бичиг Рустем Умеров, АНУ-ын талаас Трампын тусгай элч төлөөлөгч Стив Виткофф, Трампын хүргэн Жаред Кушнер нар оролцжээ.

Рустем Умеровын хувьд Украины ерөнхийлөгчийн ахлах хэлэлцээч Андрей Ермакийн оронд Флоридад хүрэлцэн ирсэн нь энэ юм. Андрей Ермакийн гэрт авлигатай тэмцэх ажиллагааны хүрээнд нэгжлэг хийснээр тэрбээр албан тушаалаасаа огцорсон билээ.

Ням гаригийн уулзалт нь хоёр долоо хоног дамнаад буй эрчимтэй дипломат ажиллагааны үргэлжлэл болж байна. Сүүлийн уулзалт үр дүнтэй болсон ч гэлээ дутуу дулимаг зүйл олон байгааг АНУ-ын Төрийн нарийн бичгийн дарга Марко Рубио мэдэгджээ. 28 зүйлт энхийн төлөвлөгөөний талаар тэр ярихдаа "Энэ бол зүгээр нэг дайныг дуусгах нөхцөл биш. Энэ бол Украиныг урт хугацааны хөгжил цэцэглэлтэд хүргэх нөхцлүүдийн тухай юм. Өнөөдөр ч бид үүн дээр ажиллалаа, гэхдээ л хийх зүйлс байсан хэвээр. Энхийн хэлэлцээний зорилго нь Украиныг бүрэн эрхт, бие даасан, хөгжин цэцэглэсэн хэвээр үлдээх явдал" гэжээ.

Харин Рустем Умеров яриа хэлэлцээний эхлэлд үг хэлэхдээ "Бид Украины ирээдүй, Украины аюулгүй байдал, Украин дахь түрэмгийллийг давтахгүй байх, Украины хөгжил цэцэглэлт, Украины сэргээн босголтын талаар ярилцаж байна. АНУ биднийг сонсч байна, дэмжиж байна. Тэд бидний ард ажиллаж байна" гэсэн юм.

Марко Рубио яриа хэлэлцээг "маш үр дүнтэй бөгөөд ашиг тустай" болсон гэж хэлсэн бол Умеров "үр дүнтэй бөгөөд амжилттай" гэж тодорхойлжээ.

Харин яриа хэлэлцээний талаар мэдэх хөндлөнгийн эх сурвалж хэлэхдээ "Флорида дахь яриа хэлэлцээ амаргүй болж өнгөрсөн. Гэхдээ хүн бүр л бүтээлчээр хандаж, шийдэл олохыг хичээж байгаа" гэжээ.

Дашрамд дурдахад, Украины ерөнхийлөгч Зеленский өнөөдөр Францад айлчилж, Эммануэль Макронтой уулзана. Харин Трампын элч төлөөлөгч Стив Виткофф ойрын хугацаанд Москвад айлчлах болжээ.