ОХУ-ын армийн Бямба гаригийн /2025.11.29/ агаарын цохилтын дараа Киев даяар 600 мянга гаруй хүн тог цахилгаангүй болжээ. Тэдгээрийн 500 мянга гаруй нь нийслэл Киевт оршин суугчид гэдгийг Украины Эрчим хүчний яам мэдээлэв. Бямба гаригаас Ням гаригт шилжих шөнө ойролцоогоор 36 пуужин, 600 орчим нисгэгчгүй нисэх онгоцоор Украинд халдсан аж. Халдлагын улмаас гурван хүн амиа алдаж, 10 гаруй хүн шархдаад байна.

Украины Агаарын хүчин 558 нисгэгчгүй нисэх онгоц болон 19 пуужинг нь саатуулж чаджээ.

Энхийн гэрээ байгуулах ажил үргэлжилж байгаа ч ОХУ энэ хүчин чармайлтыг үл харгалзан Украины иргэний болон эрчим хүчний дэд бүтцүүдэд халдсаар байна. Түүнчлэн цэргийн аж үйлдвэрийн цогцолборуудын эсрэг томоохон халдлагуудыг үйлдэж байгаа гэдгээ Оросын Батлан хамгаалах яам мэдэгдсэн билээ.

2022 онд дайн эхэлснээс хойш ОХУ өвлийн цагт дайсныхаа эрчим хүчний дэд бүтцийг онилох тактик баримталсаар ирсэн. Өнөөдрийн байдлаар Киев хотод агаарын температур цельсийн 2 хэм байна.

Украины арми мөн адил Оросын газрын тосны байгууламж тэргүүтэй эрчим хүчний дэд бүтцүүдийг онилж байна. Тэр дундаа алсын тусгалтай зэвсэг ашиглан Оросын нутаг дэвсгэрийн гүнд цохилт өгөх болсон. Энэ Бямба гаригт л гэхэд Оросын сүүдрийн флотын нэг хэсэг гэгддэг Хар тэнгис дэх хоёр танкерт цохилт өгчээ.