ОХУ-ын ерөнхийлөгч Путин Украин дахь дайныг дуусгах энхийн төлөвлөгөөний үндсэн шаардлагуудаа чангаруулж буйгаа Пүрэв гаригт /2025.11.27/ мэдэгдлээ. Тэрбээр Кыргызстан дахь айлчлалынхаа үеэр сэтгүүлчдэд мэдээлэл өгөхдөө "Украины арми одоо Оросын эзэлсэн байгаа газар нутгаас цэргээ татсан тохиолдолд л Москва зэвсгээ хураана. Тэд сүүлчийн украин хүнээ дуустал тулалдахыг хүсч байна. Зарчмын хувьд Орос үүнд бэлэн" гэж хэлэв.

Украины эзлэгдсэн газар нутгийг Оросынх гэж хүлээн зөвшөөрөхийг Путин шаардсаар ирсэн. Эдгээр нь 2014 онд эзлэгдсэн Крымийн хойг болон өдгөө ОХУ ихэнх хэсгийг нь эзлээд буй Донбасс бүс нутаг юм.

Харин Украиныг Донбассыг өгч, Оросыг түрэмгийллийнх нь төлөө шагнахыг хүсэхгүй байна. Путины мэдэгдлийн дараа Украины ерөнхийлөгч Зеленский үг хэлэхдээ "ОХУ дайныг зогсоох хүчин чармайлтыг үл тоомсорлож байна" гэсэн юм.

Украины зүүн хэсэг дэх Оросын довтолгоо хүн хүчний асар их хохирол авчирсан. Энэ янзаараа довтолгоо үргэлжилсээр байвал Донецкийн үлдсэн хэсгийг хоёр жилийн дотор эзлэх боломжтой гэж АНУ-д төвтэй Дайны судалгааны хүрээлэн мэдэгдлээ.

Эргэн сануулахад, АНУ, Оросын хамтран боловсруулсан 28 зүйлт энхийн төлөвлөгөөг өнгөрсөн амралтын өдрүүдээр Женевт болсон хэлэлцээний үеэр дахин боловсруулсан. Үүний дараа Орос, Украины хооронд санал зөрүүтэй зүйл цөөн хэд л үлдсэн гэдгийг Трамп мэдэгдсэн билээ. Гэвч өнгөрсөн долоо хоногт өрнөсөн дипломат хэлэлцээнүүдийн талаар Путин анх удаа ам нээхдээ ийнхүү энхийн гэрээний болзлуудыг чангаруулна гэж мэдэгдлээ.

Энхийн гэрээний асуудлаар АНУ-ын тусгай элч Стив Виткофф тэргүүтэй төлөөлөгчид ирэх долоо хоногт Москвад айлчлах төлөвтэй байна. Айлчлалын багт Трампын хүргэн Жаред Кушнер мөн багтаж магадгүй байна.