УИХ-ын дарга Н.Учрал өнөөдөр /2025.11.27/ чуулганы нэгдсэн хуралдааны үеэр УИХ-ын гишүүн, Эрүүл мэндийн сайд Ж.Чинбүрэнд сануулга өглөө.

УИХ-ын дарга Н.Учрал “Орон тооны бус зөвлөхөөр хурал удирдуулчихаад юу яриад байна. Зарчимтай байна шүү, нөхөд өө. Зөвлөх бол даргадаа л үйлчилнэ. Яам удирдаж, салбар төлөөлөх эрхгүй. Даргадаа л зөвлөх, мэдээллээр хангах үүрэг хүлээнэ” гэж сануулга өглөө.

Учир нь, Эрүүл мэндийн сайд Ж.Чинбүрэнг эзгүй хойгуур нь буюу өнгөрсөн Ням/2025.11.23/ гаригт Эрүүл мэндийн яаманд Тохиолдлын удирдлагын баг шуурхай хуралдаан зарлан хуралдсан. Энэхүү хуралдааныг Эрүүл мэндийн сайд Ж.Чинбүрэнгийн орон тооны бус зөвлөх Б.Дэмбэрэл удирдсан юм. Түүнийг нь УИХ-ын дарга Н.Учрал шүүмжилж дээрх сануулгыг өгөөд байна.

Сайд Ж.Чинбүрэнгийн хувьд УИХ-ын даргаар тогтохгүй Засгийн газрын тэргүүнээс ч сануулга аваад буй. Учир нь, тэрбээр “Энэ жил нэг ч хүүхдийг эмнэлгийн коридорт хэвтүүлэхгүй” гэх амлалт өгсөн ч хэлсэн үгнийх нь шүлс хатаагүй байтал эмнэлгүүд халуурсан, бөөлжсөн, гүйлгэсэн олон хүүхдийг коридортоо хүлээн авч эмлэхээс аргагүй болсон. Нөхцөл байдал иймдээ тулж, ор хүрэлцэхгүй хүндэрсэн атал Эрүүл мэндийн сайд нь эзгүй гадаадад байв. Ерөнхий сайд Г.Занданшатар өнгөрсөн амралтын өдрүүдэд Эх хүүхдийн эрүүл мэндийн үндэсний төв, Баянзүрх дүүргийн нэгдсэн эмнэлэгт ажиллаж, сайд, дарга нарыг томуу, томуу төст өвчний нөхцөл байдалтай газар дээр нь танилцаж, шуурхай арга хэмжээ авч ажиллахыг үүрэг болгосон. Гэтэл Эрүүл мэндийн сайдын орон тооны бус зөвлөх нь Тохиолдлын удирдлагын багийн шуурхай хуралдааныг удирдсан нь даарин дээр давс үрсэн хэрэг болж хувираад байна.

Г.ХОРОЛ