УИХ-ын гишүүн А.Ариунзаяа:

-УИХ-ын гишүүн О.Номинчимэг нарын 78 гишүүн хамт энэ хуулийг өргөн барьсан. Би тэдний нэг. О.Номинчимэг гишүүн сая тамхины лобби бүлгийн зохион байгуулалттай гүтгэлэгт өртсөн гэдгийг хэлж байна. Энэ бол үнэн. Маш харамсалтай. Бид О.Номинчимэгийн хуулийг батлах гээгүй. Насанд хүрсэн хүн тамхи татаж байгаа нь өөрийн ухамсарт сонголт мөн. Энэ хуулийн гол  агуулга нь насанд хүрээгүй хүүхдүүдийг хамгаалах зорилго агуулагдаж байгаа юм. Шууд болон шууд бус аргаар. Шууд арга гэхээр ерөнхий боловсролын сургуулийн орчинд нээлттэй зарж, ямар нэгэн зохицуулалтгүй гэдэг шалтгаанаар худалдаачид хүүхдүүдэд электрон тамхи зарж байгааг хориглох. Нүдэнд нь ил нээлтэй, гоё үнэр амттай тамхийг зарахыг хориглох гэсэн зорилготой. Хүүхдүүд томчуудыг л хардаг. Би том болж байгаа шүү гэдэг байдал өсвөр насныханд төрж, даган дууриадаг. Монгол Улсад хүүхдүүдийн тамхины хэрэглээг судлахад, 13-15 насны сурагчдын 11 хувь нь электрон тамхи хэрэглэдэг гэж тоо баримт гаргаж байсан. Гэтэл энэ оноос хойш тамхины зохицуулалтыг хийж чадахгүй байсаар байтал энэ хувь 25 болж нэмэгдсэн. 

Бид электрон тамхийг хориглох талаар гурван жил ярьсан. Энэ хугацаанд эсрэгээрээ сурталчилгаа болж байна. Янжуур тамхи, электрон тамхи аль аль нь хортой. Адилхан зохицуулалтад оруулж, олон нийтийн газар татахгүйгээр татвар авдаг болъё гэж байгаа юм. 

УИХ-ын гишүүн О.Номинчимэг:

-Энэ асуудлыг бид хойноос нь зохицуулах гээд явж байна. Урд хожид байгаагүй дэмжлэгтэйгээр хуулийг өргөн барьсан. Энэ асуудал дээр ЭМЯ, орон нутгийн Засаг дарга нар арга хэмжээ авах гээд хууль эрх зүйн орчин байхгүйгээс санаачлага нь зогсч, гүтгэж харлуулаад шүүхэд ханддаг байсан. Электрон тамхи хуулийн ямар ч зохицуулалтгүй байгаа. Гаалийн албан татвар дээр электрон бараа гэдгээр орж ирдэг. Тамхи гэж үзэгддэггүй, цахим орчинд өндөр ашигтай маркитенг хийдэг. Өнгөрсөн 2020 онтой харьцуулахад импортын хэмжээ 175 дахин буюу 47 мянгаас 8.2 сая ширхэг болж нэмэгдсэн. Шинэ төрлийн энэ тамхин бүтээгдэхүүнийг ирээдүй болсон сурагчид ихээр хэрэглэж байна. Энийг бид эдийн засгийн аргаар зохицуулж, хуульчилья. Нийтээрээ тамхин бүтээгдэхүүний хэрэглээгээ багасгаж, үе шаттайгаар татвар авахаас зохицуулах гэж байгаа юм.