Томуугийн вирусийн тархалт Өмнөд Солонгос улсад мөн нэмэгдэж байна. Тус улсын Өвчний хяналт, урьдчилан сэргийлэх агентлагийн (KDCA) мэдээлснээр, дөрвөн долоо хоногийн турш томуугийн батлагдсан тохиолдлын тоо өссөөр байгаа бөгөөд өнгөрсөн оны мөн үеэр 14 дахин өндөр түвшинд хүрчээ. Гол төлөв сургуулийн насны хүүхэд, өсвөр насныхны дунд тархалт өндөр байна гэж мэдээлж байна.  Клиник түвшний эмнэлгийн байгууллагуудын түүврийн тандалтын дүнгээс харахад, жилийн 46 дахь долоо хоногт буюу арваннэгдүгээр сарын 9-нөөс 15-ны хооронд улс даяарх 300 хяналтын клиникт ирсэн 1,000 өвчтөн тутмын 66.3 хувь нь томуу, томуу төст өвчний шинж тэмдэгтэй байсан.

Энэ тоо нь өмнөх долоо хоногийн 1000 өвчтөн тутамд 50.7 хувьтай харьцуулахад 30.8 хувиар өссөн үзүүлэлт юм.

Томуугийн сэжигтэй тохиолдол жилийн 42 дахь долоо хоногт 1000 өвчтөн тутмын 7.9 хувь байсан бол 43 дахь долоо хоногт 13.6 хувь, 44 дэх долоо хоногт 22.8 хувь, 45 дахь долоо хоногт 50.7 хувь болж өссөн байна. 46 дахь долоо хоногийн тоо өнгөрсөн оны мөн үетэй харьцуулахад 14.4 дахин их байна.

Насаар нь авч үзвэл сэжигтэй тохиолдол 7-12 насны хүүхдүүдийн дунд 1000 хүн тутамд 170.4, 13-18 насны өсвөр насныхны дунд 112.6 болж, сургуулийн насны залуучуудын дунд тархалт төвлөрч байгааг харуулж байна.

Эрүүл мэндийн байгууллагууд өвлийн улиралд томуу, "Covid-19"-ийн эсрэг вакцин хийлгэхийг олон нийтэд уриалж байна. Есдүгээр сарын 22-ноос хойш засгийн газар ахмад настан, бага насны хүүхэд, жирэмсэн эмэгтэйчүүдэд зориулсан үндэсний дархлаажуулалтын хөтөлбөрийг хэрэгжүүлж эхэлсэн юм.

"Одоогоор эргэлдэж буй томуугийн вирус нь А хэлбэрийн (H3N2) юм. Хэдийгээр зарим мутаци илэрсэн ч хэрэглэж буй вакцинууд үр дүнтэй хэвээр байна" гэж "KDCA" мэдэгдэв.