Миний эх орон албан тушаалын орон болоод удаж байна. Одоо болиод өгөөсэй гэтэл албан тушаал, эрх мэдэл тойрсон томилгоо хийгдэж байна. УИХ-д олонх болж, Засгийн газраа дангаараа бүрдүүлсэн МАН-ынханд эрх мэдэл, албан тушаал нь ихэдсэн үү гэснээс багадаагүй.

Энэ улсын өнгөтэй өөдтэй, мөнгөтэй төгрөгтэй газар бүрд л МАН-ын гишүүд сандайлсан.

Чинийх долоо минийх долоохон гэдэг шиг байгаадаа ханадаггүйн балгаар эрх мэдлээ булаалдаж их, бага хэмээн өнгөрсөн гурван сар орчим баян айлын эрх хүүхдүүд шиг л албан тушаал булаалдан зодолдсон.

Өнгөрсөн долоо хоногт МАН-ынхан Их хурлаа хуралдуулж, Эдийн засаг, хөгжлийн сайдаар ажиллаж байсан Н.Учралыг “Чамд бол Ок” гэснээр тэрбээр, намын даргын тамгыг ч,  УИХ-ын даргын тамгыг ч гардсан. Хэрүүл, тэмцлийн гал сая нэг намжиж, одоо л нэг төрийн ажилдаа анхаарах болов уу гэсэн иргэдийн хүсэл талаар болов.

Энд байсан хүн тэнд томилогдоход түүний орыг залгамжлах гэсэн дараа, дараагийн тэмцэл өрнөж хэд хэдэн хүний нэр Н.Учралын оронд Эдийн засаг, хөгжлийн сайдад горилж байгаа талаарх мэдээлэл хөвөрсөн. Эцэст нь МАН-ын Удирдах зөвлөлийн шийдвэрээр УИХ-ын гишүүн, Хүнс хөдөө аж ахуй хөнгөн үйлдвэрийн сайд Ж.Энхбаярыг Эдийн засаг, хөгжлийн сайдаар томилж Н. Учралын суудлыг түүнд өвлүүлэхээр шийдвэрлэв. Нэгэнт, Хүнс хөдөө аж ахуй хөнгөн үйлдвэрийн сайд Ж.Энхбаяр өөр чиг үүргийн сайдад томилогдож байгаа тул   УИХ-ын гишүүн М.Бадамсүрэнг Хүнс хөдөө аж ахуй хөнгөн үйлдвэрийн сайдад нэрийг нь дэвшүүлж дэмжсэн байна. Албан тушаалын чөтгөрийн тойргийн эхлэл нь бас төгсгөл нь ч биш энэ мэт томилгоо цаашид ч үргэлжилнэ.

МАН-ын даргаар сонгогдохдоо Н.Учрал  Г.Занданшатарын Засгийн газрыг тогтвортой ажиллуулна гэдгээ маш тодорхой илэрхийлсэн. Гэхдээ Засгийн газрыг тогтвортой ажиллуулах тухай ойлголт ганцхан Г.Занданшатарыг тогтвортой ажилуулах тухай ойлголт биш юм.

МАН-ын дарга бөгөөд УИХ-ын даргын хэлсэн үгний шүлс хатаж амжаагүй байхад Г.Занданшатарын кабинетад хоёр ч сайдын суудал ийнхүү хөдөллөө.

Хүнс, хөдөө аж ахуйн сайдын ажлаа сайн хийсэн гэж Ж.Энхбаярыг өөр сайдын суудалд шилжүүлэн томилсон гэж ойлгох уу, эсвэл муу хийсэн учраас түүний оронд хөдөө өсч, хөдөөний амьдрал мэддэг гэх шалгуур шаардлага хангасан УИХ-ын гишүүн М.Бадамсүрэнг томилж байгаа юу гэдэгт одоогоор тодорхой хариулт өгөх хүн алга.

Үнэхээр Хүнс, хөдөө аж ахуйн сайдаар сайн ажилласан бол Ж.Энхбаярыг эхлүүлсэн ажлуудынхаа үр дүнг үзэж, илүү сайн ажиллуулах нь бол жинхэнэ утгаараа Засгийн газрын тогтвортой бодлого болов уу. Сайдын суудалд горилогчдын CV-г харахад хэн хэнд нь хариуцаж ажиллах салбартаа мэргэшсэн байдал харагдахгүй байгаа нь хамгийн хачирхалтай. Хөдөө өсч, хөдөөний амьдрал мэддэг гэх шалгуураар сайдын суудалд оччихдог бол 3.6 сая монголчууд бүгдээрээ хөдөө аж ахуйн сайдын албыг хашчихна. Бүр байгээ гэхэд насаараа мал, маллаж хөдөө хөхөрч, гадаа гандсан захын нэг малчин сайд хийчих юм байна л даа. Энэ мэт инээдтэй шалгуураар сайд болсон түүх ганц энэ ч биш л дээ. Өмнө нь Эрчим хүчний сайд Б.Чойжилсүрэн сайдын албанд очихдоо их сургуульд сурч байхдаа эрчим хүчний чиглэлийн хичээл үзэж байсан гэдгээ шууд хэлж байсан. Одоо ч Монголчууд бид ийм элгийн томилгоонд дөжиртлөө дасчихсан нь эмгэнэлттэй юм даа. Хэдхэн цагийн өмнө “Намайг сайдаар томилох тухай асуудал яригдаагүй гэж байсан хүн, хэдхэн цагийн дараа би л энэ салбарыг хөл дээр нь босгож чадна” гэчихсэн мөнгөн аягатай сүү, хадаг яндар, дээр тамга тэмдэгээ гардаж байдаг улаан цагаандаа гарсан увайгүй үйлдэл гаргадаг болсон.

Ер нь сүүлийн үед сайдаар томилогдохоо  өөрөө ч мэдээгүй байхад нь сайд болгочихдог,  сайдаасаа буухаа ч мэдээгүй байхад нь сандал суудалд нь өөр хүн томилчихдог хачирхалтай жишиг тогтчихсон нь бодит үнэн.

Удаах томилгоо Монголбанкны ерөнхийлөгч байлаа. Мөнгөний бодлогыг тодорхойлон хэрэгжүүлэх Төв банкны ерөнхийлөгчөөр "Эрдэнэс Монгол"-ын гүйцэтгэх захирал С.Наранцогтыг томилон ажиллуулахаар МАН-ын дарга, УИХ-ын дарга Н.Учрал намын бүлэгтээ танилцуулсан. Монголбанк, Санхүүгийн зохицуулах хороо, Үндэсний Аудитын газрын үйл ажиллагаа, чиг үүрэг, харилцаа хамаарал нь Засгийн газраас ангид, УИХ-д ажлаа тайлагнах, УИХ-ын дарга удирдлагыг санал болгон томилох эрх үүрэгтэй явж ирсэн. Тэр дагуу УИХ-ын дарга Монголбанкны одоогийн ерөнхийлөгчийн бүрэн эрхийн хугацаа /6 жил/ дуусгавар болсон тул шинэ ерөнхийлөгчийг Н.Учрал эрх мэдлийнхээ хүрээнд тодруулсан нь энэ.

Угтаа Н.Учрал "Эрдэнэс Монгол"-ын гүйцэтгэх захирал С.Наранцогтод “Чамд бол ОК” гэсэн байна. С.Наранцогтын хувьд дээрх томилгоонуудтай харьцуулахад мэргэжлийн хүн гэгдэж байгаа ч сайн ажилласан бол улам сайжруулах үүрэг хүлээж салбарт нь ажиллуулах нь төрийн тогтвортой бодлого гэдгийг дахин сануулах нь илүүц биз ээ. Миний эх орон, албан тушаалын, сандал суудлын эх орон болсоныг шил шилээ дарсан шилэн бус томилгоонууд харуулж байна.