Аонишики Ням гаригт (2025.11.23) болсон плейоффт Якозүна Хошорюу С.Бямбасүрэнг ялснаар анх удаа башёгийн түрүүг хүртсэн Украин гаралтай сүмо бөхөөр тодорлоо. Аонишики арваннэгдүгээр сарын мэргэжлийн сүмо бөхийн тэмцээний сүүлийн өдөр озэки Котозакураг ялсан. Үүний дараа 12 хожил, 3 уналттай ижил үзүүлэлттэй байсан Хошорюутай дахин барилдаж, ар талаас нь шидэх мэхээр ялалт байгуулжээ.

Өдгөө 21 настай Аонишикигийн жинхэнэ нэр нь Данило Явгусишин бөгөөд Кюүшү башёд сэкивакэ буюу гуравдугаар зиндаанд дэвшсэн.

Тэрбээр ердөө 13 дахь башёгийнхаа дараа энэ зиндаанд хүрчээ. Түрүүнд шалгарсныхаа дараах ярилцлагадаа Аонишики "Мэдрэмжээ үгээр илэрхийлэхийн аргагүй байна. Энэ жилийн сүүлийн башёд түрүүлсэндээ үнэхээр баяртай байна" гэжээ. Тэрбээр мөн башёгийн турш сандарсан байсан ч өөрийн өдөр тутмын хийдэг зүйлээ л хийсэн гэв. Мөн энэ амжилт нь багшийнхаа зааврыг тууштай дагасны үр дүн гэж нэмж хэлсэн байна.

Озэки зэрэгт дэвших магадлалын талаар асуухад Аонишики бүр ч өндөр зиндаанд хүрэхийг зорьж байна гэжээ. Тэрбээр өөрийн карьертаа зөв замаар явж байгаагаа мэдэрч байна гэж онцолсон байна.