ОХУ-ын Төв банк зарим ажилтнуудаа галт зэвсгийн сургалтад хамруулах бэлтгэл хийж байгаа бололтой. Тодруулбал, өнгөрсөн Мягмар гаригт /2025.11.18/ зарлагдсан банкны тендерт Москва хот болон ойролцоох тусгай зөвшөөрөлтэй талбайд автомат зэвсгээр буудлагын хичээл заах гэрээ тусгагдсан байна.

Гэрээг гүйцэтгэгч нь сургалтын байршил, зэвсэг, сум хэрэгсэл болон мэргэшсэн багш нарыг бүрэн хангахаас гадна гэрээ дуусмагц холбогдох бүх мэдээллийг устгах үүрэгтэй.

Төв банк ямар ажилтнуудыг, хэзээ сургалтад хамруулахыг тодорхой заагаагүй байсан. Гэсэн хэдий ч Баасан гаригт тендерийн үйл ажиллагаа дууссан байв. Оросын Төв банк өнгөрсөн жилээс эхлэн аюулгүй байдлаа сайжруулах оролдлого хийж байна. Тухайлбал, дэд захирал болон ахлах албан тушаалтнуудад Макаров гар буу болон автомат буу авч явах, хадгалах зөвшөөрөл хүссэн байдаг. Тухайн үед энэ арга хэмжээг эзлэгдсэн Украины нутаг дэвсгэрт ажиллаж буй банкны ажилтнууд, хөрөнгийн аюулгүй байдлыг хангахад чиглэсэн гэж банкны хэвлэлийн төлөөлөгч тайлбарлаж байв. Гэсэн хэдий ч зэвсэг зүүх эрхийг зөвхөн одоо ажиллаж буй хамгаалалтын ажилтнуудад олгохоор засгийн газар хязгаарласан юм.

Москвагийн шүүх хоёрдугаар сард Үндэсний гвардын байцаагчид банкны хамгаалалтын барилгад хоёр гар буу буруу хадгалсан зөрчил илрүүлсний дараа Төв банканд торгууль оногдуулжээ. Төв банк одоог хүртэл гэрээт галт зэвсгийн сургалтын хөтөлбөрийн талаар ямар нэгэн тайлбар хийгээгүй байна.