ОХУ-ын ойрын холбоотон Беларусь улс Украин 31 иргэнийг өршөөсөн гэж Бямба гаригт (2025.11.22) мэдэгдлээ. Энэ нь Беларусийн ерөнхийлөгч Александр Лукашенко болон АНУ-ын ерөнхийлөгч Дональд Трамп нарын хоорондын тохиролцооны хүрээнд хэрэгжиж буй шийдвэр аж.

Трамп 1994 оноос хойш засгийн эрхийг атгаж, хэвлэл мэдээлэл болон улс төрийн сөрөг хүчнийг дарамталж ирсэн Лукашенкотой хийсэн яриа хэлэлцээндээ, улс төрийн хоригдлуудыг суллахыг гол төлөв шаардсан байна.

Хариуд нь АНУ Беларусь улсын үндэсний агаарын тээвэрлэгч Белавиад тавиад байсан хоригийн нэг хэсгийг суллах болно гэж амласан байна. Мөн онгоцнуудад засвар үйлчилгээ хийх, сэлбэг худалдан авахыг зөвшөөрчээ. Лукашенкогийн хэвлэлийн төлөөлөгч Наталья Эйсмонт улсын телевизээр мэдэгдэхдээ, “Манай улсад гэмт хэрэг үйлдсэн 31 украиныг ерөнхийлөгч өршөөлөө” гэж хэлсэн байна. Тэрбээр мөн Украины хүсэлтээр хийгдсэн энэхүү өршөөл нь АНУ-ын ерөнхийлөгч Дональд Трамп болон Беларусь улсын ерөнхийлөгч Александр Лукашенко нарын хооронд хүрсэн тохиролцооны үр дүн гэж онцлон тэмдэглэсэн.

Энэ алхам нь хөрш оронд өрнөж буй зэвсэгт мөргөлдөөнийг шийдвэрлэх нөхцөлийг бүрдүүлэхэд чиглэсэн гэж хэвлэлийн төлөөлөгч нэмж дурдсан бөгөөд Украины иргэдийг Киевт шилжүүлэх ажиллагаа эхэлсэн байгаа аж.

Беларусь сөрөг хүч, засгийн газрыг шүүмжилсэн хүмүүсийг ихэвчлэн “экстремизм”-ийн хэргээр олон жилийн хорих ял оноодог. Өршөөгдсөн украин иргэд ямар хэрэгт буруутгагдсан нь тодорхойгүй байна. Үүнээс өмнө Лукашенко хэдэн арван улс төрийн хоригдол, нэр хүндтэй идэвхтэн, сэтгүүлч, шашны төлөөлөгчдийг сулласан билээ. Хүний эрхийн байгууллагуудын мэдээлснээр, Беларусийн хорих газарт 1,000 гаруй улс төрийн хоригдол ял эдэлсэн хэвээр байгаа юм.