БНХАУ-ын Гадаад хэргийн яам мэдэгдэл гаргаж, Японы ерөнхий сайд Такаичи Санаэг Тайваньтай холбоотой боломжит онцгой байдлын талаар хэлсэн мэдэгдлээ буцаан татахыг шаарджээ. Мөн Япон улс харилцан ашигтай, стратегийн түншлэлийг хөгжүүлэх эрмэлзлээ бодит үйлдлээр харуулах ёстой гэж мэдэгдэв.

Гадаад хэргийн яамны хэвлэлийн төлөөлөгч Мао Нин энэ талаар Баасан гаригийн (2025.11.21) хэвлэлийн хурлын үеэр хэлжээ. Мао Такаичигийн Тайваньтай холбоотой мэдэгдэл хийсэн өдрийг дурдсан байна. Эл өдөр Японы Хятадтай хамтрах гадаад бодлогын стратегийн холбоог хөгжүүлэх чиглэл өөрчлөгдөөгүй гэж Такаичи хэлсэн байжээ. Энэ чиглэл нь өнгөрсөн сард хоёр орны удирдагчийн хийсэн уулзалтын үеэр баталгаажсан аж.

Энэ сарын эхээр Японы парламентын асуулт-хариултын үеэр Такаичигийн Тайванийн талаар хийсэн мэдэгдэлд Хятад улам хүчтэй эсэргүүцэл илэрхийлсээр байна.

Мао Такаичигийн мэдэгдлийг илт буруу бөгөөд Хятадын ард түмний дургүйцэл, эсэргүүцлийг төрүүлсэн гэж хэлэв. Тэрбээр Хятад улс эдгээр үгэнд тууштай эсэргүүцэж байгаа гэдгийг онцолсон. Мөн хэрэв Япон улс үнэхээр харилцан ашигтай стратегийн харилцааг хөгжүүлэхийг хүсэж, тогтвортой, бүтээлч харилцаа байгуулахыг хүсэж байгаа бол уг мэдэгдлээ нэн даруй буцаан татаж, бодит алхмаар Хятадтай хамтран ажиллах хүслээ харуулах хэрэгтэй гэж мэдэгджээ.