Украины ерөнхийлөгч Владимир Зеленский АНУ-аас дэмжлэгээ алдах эрсдэлтэй болсон гэж анхаарууллаа. Учир нь Орос-Украины дайныг дуусгах шинэ төлөвлөгөө АНУ гаргасан. Энэ төлөвлөгөө нь Украиныг зүүн нутгийн зарим газар нутагтаа бууж өгөх, цэргийн тоогоо цөөлөх, НАТО-д элсэхгүй байх амлалт өгөхийг шаардсан байна. Эдгээр нөхцөлийг Украин урьд нь хүчтэйгээр няцааж ирсэн. Мөн АНУ-ын шинэ төлөвлөгөө Орост давуу талтай гэж олон хүн үзэж байна. Зеленский энэ үеийг Украины хувьд хамгийн хүнд мөчүүдийн нэг гэж хэлэв.

Тэрбээр Украиныг “нэр төрөө алдах” эсвэл “чухал түншээ алдах” хоёрын аль нэгийг сонгох нөхцөл байдалд орж магадгүй гэж анхааруулжээ.

Мөн АНУ-тай тайван байдлаар ярилцаж, өөр хувилбар санал болгоно гэсэн байна. Харин Оросын ерөнхийлөгч Владимир Путин АНУ-ын төлөвлөгөөг “энхийн суурь” байж болно гэж мэдэгдсэн байна. Гэсэн хэдий ч Орос хүсвэл тулааныг үргэлжлүүлэхэд бэлэн гэжээ.

АНУ-ын ерөнхийлөгч Дональд Трамп хэлэхдээ, Зеленскийд энэ төлөвлөгөөг таалагдах л ёстой, үгүй бол дайн үргэлжилнэ гэжээ. Мөн шинэ төлөвлөгөөг хүлээн авах хугацааг Украинд шаардлагатай хэмжээгээр олгоно гэж онцолсон байна. Украин АНУ-ын зэвсэг, агаарын довтолгооноос хамгаалах систем, тагнуулын мэдээлэлд хүчтэй найдаж байгаа. Гэхдээ "G20" дээд хэмжээний уулзалтаас өмнө Их Британийн ерөнхий сайд Кир Стармер болон Европын бусад удирдагч Зеленскийд дэмжлэгээ илэрхийлж, шударга, удаан үргэлжлэх энх тайвныг хүсэж буйгаа мэдэгдсэн.

Зарим мэдээлэл нь ил болсон АНУ-ын төлөвлөгөөнд Украин дараах зүйлсийг хийх ёстой гэжээ. Үүнд:

• Украины хяналтад байгаа Донецкийн зарим хэсгээс Киев цэргүүдээ гаргах,
• Донецк, Луганск болон 2014 онд ОХУ-д нэгтгэгдсэн Крымийг Оросын хяналтад байхаар хүлээн зөвшөөрөх,
• Херсон, Запорожийн шугамыг одоогийн фронтоор нь царцаах,
• Цэргийн тоог 600 мянган хүнээр хязгаарлах,
• Европын сөнөөгч онгоцыг Польшид байрлуулахыг зөвшөөрөх,
• НАТО цаашид өргөжихгүй гэдгийг хүлээн зөвшөөрөх.

Мөн Орос дахин дэлхийн эдийн засагт нэгдэх, бүр "G7"-д эргэн орж, "G8" болох боломжтой гэжээ. Гэвч Украины олон иргэд энэхүү төлөвлөгөөнд дургүйцэж байна. Зарим нь үүнийг энхийн төлөвлөгөө биш, дайныг үргэлжлүүлэх төлөвлөгөө гэж тодорхойлсон. Үүнээс гадна, Оросын эзлэлтэд байгаа хүмүүс “Украин биднийг мартсан” гэх суртал ухуулгад дарагдаж байгаа ч энэ гэрээг хүлээн зөвшөөрнө гэж найдахгүй байна. Орос одоогоор Украины газар нутгийн ойролцоогоор 20 хувийг эзэлж, ихээхэн хохирол амсаж байгаа ч фронтын дагуу аажмаар ахиж байна.