Баянгол дүүргийн 29 дүгээр хороо, Гурвалжингийн гүүр ормын зам талбайг чөлөөлж, тохижилтын ажлыг эхлүүлсэнтэй холбоотой Нийслэлийн Засаг дарга Х.Нямбаатар өнөөдөр /2025.11.20/ мэдээлэл хийв.

Тэрбээр, сүүлийн бараг 30-аад жил элс цемент зардаг байсан гаднах талбайг чөлөөлж, тохижуулах ажлыг Баянгол дүүргээс хийсэн. Суурьшлын бүс тэлж байгаа энэ цаг үед замбараагүй гадаа худалдааг зогсоож, эрчим хүчний гудамжинд тусад нь талбай гаргаж, дүүргийн татварын газар бүртгэлжүүлж, зогсоол талбайн ажлыг шийдэж өгч байгаа. Ирэх оноос Баянгол дүүргийн Гурвалжингийн гүүрний урд талын гаднах тохижилтыг хийхээр төлөвлөсөн. Хаа сайгүй элс хайрга зарж байна. Цаашид ил талбайд элс, хайрга зарахыг болиулна. Сүүлийн 30-аад жил энд хөглөрч байсан элс, хайрга, цементийн ажлыг зогсоосон.  “СТТ” төвийн эзэмшил газар зөвхөн барилгын суурийн дагуу л олгогдсон. Гэтэл нийтийн эзэмшлийн зам, талбайд павильон, контейнер тавьж барилгын материал зарж байна.

Бид аж ахуй эрхлэгчдэд саад учруулахыг хүсдэггүй. Гол асуудал нь явган замыг чөлөөлж, газар эзэмших эрхээ сунгуулж, дуудлага худалдааны төлбөрөө төлөх шаардлагыг тавьсан.

Хэрвээ шаардлагыг хүлээн авч, биелүүлэхгүй бол энэ бизнесийг зогсооно. Цаашид  хотын бүтээн байгуулалт тохижилтын ажил зөвхөн зун, хавар, намар үргэлжилдэг биш жилийн дөрвөн улирал газар чөлөөлөх ажил эрчимжинэ. Гурвалжингийн гүүрэн доогуур буцаж эргэдэг замыг Баянгол дүүргийн 20 дугаар хороотой холбосон зам тавих ажлын төсөв ирэх оны төсөвт суулгасан. Зорчилт хөдөлгөөнийг багасгах зорилгоор Алтай хотхоны сургууль, Golden Park хотхоны хажуу талын сургууль, цэцэрлэгийг барина. Мөн Нарын хороололд өргөтгөл барихаар төлөвлөж байна.