Каталончууд лигтээ түрүүлэхийн төлөөх тэмцлээ үргэлжлүүлж, энэ удаа талбайдаа хүчтэй Баскийн багийг хүлээн авахад бэлэн болжээ. 

Түүхэн өрсөлдөөн

Блауграна болон Атлетик Бильбао нарын өрсөлдөөн эртний уламжлал, онцгой статустай. Хоёр баг хоёулаа 1929 онд Примера Дивизион эхэлснээс хойш дээд лигээс хэзээ ч унаж үзээгүй. Тиймээс тэд Реал Мадридын хамт Испанийн хөлбөмбөгийн “классик” төлөөлөгчид гэж тооцогддог. Түүхэнд Барселона 28 удаа аварга болсон бол “Арслангууд” 8 удаа Ла Лигт түрүүлсэн.

Каталон болон Баск үндэстний тоглолтууд бол хоёр түүхт клубын тулаан төдийгүй Испанийн хоёр өвөрмөц хөлбөмбөгийн бүс нутгийн өрсөлдөөн. Тэдний тоглолт үргэлж тэмүүлэл, тууштай тоглолт, гайхалтай гоолоор дүүрэн байдаг.

Энэ улирлын тоглолтод сонирхол татах хэд хэдэн шалтгаан бий. Зуны солилцоо наймааны цонхны үеэр Атлетикийн гол тоглогч Нико Уильямс Барселонад нэгдэхээс татгалзсан нь каталончуудын "уур"-ыг хүргэсэн.

Барселонагийн гоолын бороо

Реал Мадридын эсрэг хүссэн үр дүнгээ авч чадаагүй Барса бусад багуудаас хариугаа чангахан авсан. Эхлээд Эльчег 3-1-ээр, дараа нь Сельта Виго-г 4-2-оор хожив. Каталоны багийн од, жигүүрийн тоглогч Ламине Ямал хоёр тоглолтод дараалан гоолдсон бол туршлагатай довтлогч Роберт Левандовски Балаидос цэнгэлдэхэд хэт-трик толилуулсан.

Атлетикийн тааруу форм

Сүүлийн тоглолтуудад Баскчууд хожлын гурван оноо цуглуулахад бэрх байна. Эльчетэй 0-0-ээр тэнцэж, Хетафе болон Реал Сосиедадад хожигдсоны дараа тэд Овьедог 1-0-ээр ялсан. Гэхдээ хүснэгтийн ёроолд буй даруухан өрсөлдөгч Атлетикт ихээхэн хүндрэл учруулсан.

Ирэх тоглолтоос юу хүлээх вэ?

Барселона уламжлал ёсоор давуу бөмбөг эзэмших хэв маягаа үргэлжлүүлнэ. Энэ улиралд Барсагийн гол хөдөлгөгч хүч болж буй хагас хамгаалагч Фермин Лопес Бильбаогийн эсрэг аюул учруулж мэднэ. Мөн формтой буй Левандовски ч чухал үүрэг гүйцэтгэнэ.

Жигүүрийн тоглогчид Ламине Ямал болон Рафинья нар гэмтлээсээ эдгэрсэн ч, бэлэн эсэх нь тодорхойгүй хэвээр. Рафинья хоёр сарын турш тоглоогүй тул зүүн жигүүрт Маркус Рашфорд гараанд гарах магадлал өндөр.

Атлетик хамгаалалтдаа, ялангуяа Аймерик Лапорт дээр тулгуурлаж, Нико Уильямсаар дамжуулан хурдтай сөрөг довтолгоо хийхийг зорих болно. Барсагийн хамгаалалт отон тоглолтын хавх тавихдаа алдаа гаргах нь элбэг тул довтлогч Горка Гурузета үүнийг ашиглах боломжтой.

Хоёр багт ч гэмтэл бэртэл олон байна. Каталончууд одоогоор хагас хамгаалалтын гол тоглогч Педригүй, Атлетик талд Инаки Уильямс болон Ойхан Санcет нар байхгүй. Үүнээс гадна Барсагийн хагас хамгаалагч Френки де Йонг Сельтагийн эсрэг тоглолтын төгсгөлд улаан карт авсан тул энэ тоглолтод оролцох боломжгүй.

Камп Ноу-д эргэн ирлээ

Каталончуудын гайхамшигт стадион урт удаан хугацааны засвар шинэчлэлийн эцэст бэлэн болжээ. Барселона 2023 оны тавдугаар сараас хойш өөрийн талбайдаа тоглоогүй бөгөөд энэ хугацаанд Эстади Олимпик Луис Компансыг ашиглаж байсан билээ. Атлетиктэй хийх энэхүү тоглолт нь шинэчлэгдсэн Камп Ноугийн анхны албан ёсны тоглолт юм. Гэхдээ стадионыг бүрэн нээх зөвшөөрөл хараахан гараагүй тул эхний тоглолтод 45,401 үзэгч л орох боломжтой.