Саудын Арабын хунтайж Мохаммед бин Салманы айлчлалаас өмнө АНУ-ын ерөнхийлөгч Дональд Трамп чухал хэлэлцээнд бэлтгэж байна. Тодруулбал, Саудын Арабт "F-35" сөнөөгч онгоц худалдахаар төлөвлөж байна. Тус улс Иран болон бүсийн бусад заналхийллээс хамгаалалтаа нэмэгдүүлэхийн тулд 48 хүртэлх онгоц авахыг хүсэж байна. Энэ нь хэдэн тэрбум ам.долларын үнэ хүрэх хэлцэл юм.

Айлчлалын үеэр бусад томоохон хэлэлцээг мөн зарлах төлөвтэй байна. АНУ-ын өндөр албан тушаалтны хэлснээр, Саудын Араб АНУ-ын хиймэл оюун ухааны дэд бүтцэд хэдэн тэрбум ам.доллараар хөрөнгө оруулах бөгөөд цаашид иргэний цөмийн эрчим хүчний салбарт хамтран ажиллах санал гаргаж магадгүй.

"F-35" онгоц худалдах нь бодлогын томоохон өөрчлөлт бөгөөд Ойрхи Дорнод дахь хүчний тэнцвэрт нөлөөлж болзошгүй. Зарим албан тушаалтнууд Израилийн цэргийн давуу байдалд сөргөөр нөлөөлнө гэж санаа зовж байна. Энэ хэлцэл нь Саудын Араб, Израиль хоёрын харилцааг хэвийн болгохыг зорьсон Трампын хүчин чармайлтын дунд өрнөж буй. Гэхдээ Саудын Араб Палестиныг тусгаар улсын баталгаагүй бол Абрахаамын хэлэлцээрт нэгдэхгүй гэж мэдэгджээ. Харин Израиль үүнийг эсэргүүцсээр байна. Мөн Трампын засаг захиргааны нэг санаа зовж буй асуудал бол Хятад улс энэ худалдааны улмаас АНУ-ын технологид нэвтрэх эрсдэл юм. Учир нь Бээжин Саудын Араб болон Арабын нэгдсэн Эмираттай ойр харилцаатай байдаг.