Японы ерөнхий сайд Санаэ Такаичигийн Тайванийн талаарх мэдэгдлийн дараа хоёр улсын харилцаа хурцдаад байгаа билээ. Хурцадмал харилцааны хамгийн сүүлийн жишээ нь Японы хоёр ч алдартай киног Хятадад гаргахыг хориглосон явдал болов.

Хориглосон уран бүтээлүүд нь "Cells at Work!" болон "Crayon Shin-chan the Movie: Super Hot! The Spicy Kasukabe Dancers" юм. Хит цуврал "Demon Slayer: Infinity Castle"-ийг хориглох эсэх нь тодорхойгүй байна. Гэхдээ хоёр улсын маргаан гүнзгийрэхийн хэрээр тасалбарын борлуулалт муудсан бололтой.

"Crayon Shin-chan the Movie: Super Hot! The Spicy Kasukabe Dancers" нь залуу хүү болон түүний найзуудын адал явдлыг өгүүлдэг инээдмийн төрлийн кино. Тус киног ойрын хугацаанд нээхээр төлөвлөж байжээ. Харин "Cells at Work!" нь хүний цусны эсүүд вирусүүдтэй тэмцэж буй тухай өгүүлдэг манганаас санаа авсан кино. Кинонуудыг хэр хугацаагаар хориглосон нь тодорхойгүй байна.

Эргэн сануулахад, Такаичи парламентын хуралдааны үеэр үг хэлэхдээ Хятад улс Тайванийг заналхийлж, цэргийн ажиллагаа нь амьд үлдэхийн төлөөх тэмцлийг үүсгэвэл Япон хөндлөнгөөс оролцохоос өөр аргагүй гэсэн билээ. Үүний дараа Хятад улс иргэдээ Японд аялахгүй байхыг зөвлөхийн зэрэгцээ Бээжинд сурч байгаа оюутан залуустаа нөхцөл байдлыг эргэцүүлэн бодохыг уриалсан. Хятадын хариу үйлдлээс улбаалаад Японы аялал жуулчлал, агаарын тээвэр, хувьцааны ханш гээд бүх зүйл уналтын байдалд оржээ.