Польш, Украины хилийн зурваст байдаг галт тэрэгний зам дээр өнгөрсөн амралтын өдрөөр дэлбэрэлт болжээ. Польшийн ерөнхий сайд Дональд Туск өнөө өглөө /2025.11.18/ ослын газарт очсон аж. Тэрбээр энэхүү дэлбэрэлтийн ард хэн байгаагаас үл хамааран хариуцлага хүлээлгэнэ гэж мэдэгдээд байна. Мөн уг ослыг урьд өмнө байгаагүй хорлон сүйтгэх ажиллагаа гэж нэрлээд, галт тэрэгний зам дээр дэлбэрэлт болсон нь бүхэл бүтэн галт тэргийг тэр чигээр нь дэлбэлэх гэсэн санаа байж магадгүй гэжээ.

Ослоос болж хүний амь хохироогүйд сэтгэл хангалуун байгаагаа мөн илэрхийлсэн байна.

Дэлбэрэлтийн дараа аюулгүй байдлын албан тушаалтнууд яаралтай хурал зарлажээ. Тус уулзалтын дараа Польшийн Тусгай албаны сайд Томаз Сиемониак хэлэхдээ дэлбэрэлтийг гадны хүчний захиалгаар үйлдсэн байх магадлалтай гэжээ. Тэрбээр Кремлийг шууд нэрлээгүй ч гэлээ сүүлийн жилүүдэд Польш улс Орос, Украины дайнаас үүдэлтэйгээр янз бүрийн халдлагад хэд хэд өртсөн билээ. "Халдлагын ард байгаа хүмүүс галт тэрэгний дэд бүтцийг онилох шинэ тактик эхлүүлэхээр шийдсэн бололтой" гэж Томаз Сиемониак хэлжээ.

Гэрчийн мэдүүлснээр тухайн үед газ дэлбэрэв үү, эсвэл нисгэгчгүй нисэх онгоц дээрээс унав уу гэлтэй чимээ гарсан байна.

Осол Варшав болон Люблин хотын зүүн өмнөд хэсгийн зам дээр болжээ. Энэ нь Украин руу тусламж хүргэдэг нэн чухал зам гэдгийг Дональд Туск онцолсон юм. Польшийн төмөр замын сүлжээ тэр чигээрээ цэргийн хангамжийн нийлүүлэлтийн чухал суваг болдог. Үүний зэрэгцээ иргэдийн хил давах гол гарц болдог аж.