Украины фронтын нөхцөл байдлыг тогтворгүйтүүлэхийн зэрэгцээ заримдаа давуу тал ч болж хувираад буй нэгэн шинэ хүчин зүйл бол цаг агаар. Тодруулбал, манантай цаг агаарын улмаас талууд нисгэгчгүй нисэх онгоц ашиглахад төвөгтэй болоод байгаа аж. Гэхдээ Орос ч, Украин ч мананг давуу тал болгон ашиглаж чадаж байна.

Тухайлбал, ОХУ үзэгдэх орчин хязгаарлагдмал үеийг ашиглаад Украины өмнөд хэсэг дэх Вовча голын дээгүүр түр гүүр барьж амжжээ. Уг гүүрээр дор хаяж 10 тээврийн хэрэгсэл гаргасан бөгөөд тэдгээрийгээ Дачне тосгонд тараан байрлуулжээ.

Украины цэрэг Станислав Буниатовын хэлэхээр, манан маш өтгөн байгаа учир дайсны тал төвлөрч байрласаар байна.

Сүүлийн үед стратегийн ач холбогдолтой Покровскийн төлөөх тулаан өрнөөд байсан билээ. Тэгвэл Покровск орчмын нисгэгчгүй нисэх онгоцны ажиллагаа манангийн улмаас саатаад байна. "Манантай үед нисгэгчгүй онгоцонд өртөлгүйгээр байрлал солиход амар байдаг ч үндсэндээ нөхцөл байдал таамаглахын аргагүй хэцүү байна" гэж Донбасст тулалдаж буй цэрэг ярьжээ. Цаг агаарын тусламжтайгаар ОХУ Запорожье мужид Яблукове болон өөр хоёр ч тосгоныг эзэлж чадсан байна.