МАН-ын 31 дүгээр Их хурал өнөөдөр хоёр дахь өдрөө үргэлжилж, намын шинэчилсэн дүрмийг хэлэлцэн батлахын зэрэгцээ Бага хурлын гишүүдийг шинээр сонгож, Ерөнхий нарийн бичгийн дарга, нарийн бичгийн дарга нарыг шинээр тодруулна.

Энэ цаг мөчид МАН-ын “гал тогоог” хэн барих вэ гэдэг асуудал улс төрийн хүчнүүдийн ч анхаарлаа хандуулсан сэдэв болж байна.

Учир нь, угтан ирэх 2027 оны Ерөнхийлөгчийн сонгууль, 2028 оны УИХ-ын сонгуулийн хамаг ачааны хүндийг үүрч ажиллах хүн Ерөнхий нарийн бичгийн дарга.

МАН-ын хувьд 2016 оны УИХ-ын сонгуулиас эхлэн гурав дараалсан ялалтыг нүүрсний хэрэгт нэр холбогдоод буй, УИХ-ын дарга асан, УИХ-ын гишүүн Д.Амарбаясгалан авч ирсэн. Иймээс тэрхүү амжилтыг бататгах генсек хэрэгтэй.

МАН-ын Ерөнхий нарийн бичгийн дарга Я.Содбаатарыг улирааж магадгүй гэх мэдээлэл цацагдах болсон. Гэвч нам дотор хагарал явагдаж буйн зэрэгцээ Бага хурлаар гишүүдээ "базаж" чадаагүй хүн хоёр том сонгуулиар амжилт үзүүлж чадах уу гэдэг асуудал ч сөхөгдөж байгаа аж. Я.Содбаатар генсекийн хувьд 2024 оны долдугаар сард хуралдсан Бага хурлаас томилогджээ. Нэгэнтээ МАН-ын дарга нь Ерөнхийлөгчийн гарын хүн томилогдсон нөхцөлд Ерөнхий нарийн бичгийн даргыг УИХ-ын дарга асан, УИХ-ын гишүүн Д.Амарбаясгалан талаас томилж, эрх мэдлийн хуваарилалтыг нэг талд хэт олгохгүй байх талд анхаарах болов уу гэдэг хүлээлт байна.

Нөгөө талдаа МАН-ын дүрэмд хийх шинэчлэлээс их зүйл хамаарна. Хэрвээ МАН-ын дүрэмд "Намын дарга Ерөнхий сайд байна" гэдэг хатуу заалт оруулж баталбал Засгийн газрын асуудал хөндөгдөнө. МАН-ын дарга, УИХ-ын гишүүн, Эдийн засаг, хөгжлийн сайд Н.Учрал Их хурал дээр өчигдөр өрсөлдөж байхдаа "Засгийн газрыг тогтвортой ажиллуулна" гэх байр суурь илэрхийлсэн ч намын дүрэмд дээрх заалт орох эсэхээс эл асуудал хэрхэх нь шийдэгдэх нь.

Мөн Их хурлаас Бага хурлын гишүүдийг сонгоно. Тооноор орж ирсэн гишүүдийг Бага хурлын гишүүнээр сонговол Их хурлыг ч хаяж чадна шүү гэдгээ Увс аймгийн МАН-ын хорооны дэд дарга С.Анхбаяр мэдэгдсэн. Энэ талаар тэрбээр "Бага хурлын гишүүдээ аймгаасаа сонгоорой. Хэн нэгэн даргад таалагддаг, таалдагийн төлөө Бага хурлын гишүүн болоод тооноор орж ирээд дээрээс гаргахыг зөвшөөрөхгүй шүү. Ингэдэгтээ тулж нэр оруулж ирвэл бид нар Их хурлыг чинь хаяж чадна, та нар УИХ-ыг хаядаг юм билээ. Бид нар энэ Их хурлыг чинь хаяна. Шинэ намын дарга Засгийн газраа байгуулаарай, УИХ-ын дарга өөр суудал руу явна гэж байхгүй шүү. Өөх ч биш булчирхай ч биш, өдөр ч биш шөнө ч биш байж ханалаа.

Ард түмэн биднийг таалахгүй байна, 2028 оны сонгуульд ийм байдлаар ялагдахад ойрхон байна. Тийм учраас юмсаа тодорхой болгоод Засгийн газраа байгуулаад өнгөрсөн хугацааны бантангаа цэгцлээд 2027, 2028 оны сонгуульд тодорхой оръё.

Ах дүүгийн хайр, амраг садны харилцаа байхгүй, шударга явцгаая, ил тод байцгаая. Үүнийг жирийн гишүүдийг төлөөлж ирснийхээ хувьд хэлж байна. Даргад долигнох гэж ирээгүй” гэж тодорхой тайлбарласан.

Тиймээс жирийн гишүүдийнхээ санал бодлыг тусгаад Бага хурлын гишүүдээрээ орон нутагт жинхэнэ хөл болж ажилладаг хүмүүсээ сонгож чадах уу, МАН-д дараалсан хоёр ялалтыг авч ирэх генсек тодорч чадах уу гэдэг өнөөдрийн Их хурлаас гарах шийдвэрээс хамаарна. Хэрэв Их хурал дээрээ өнөөдөр хуваарилах албан тушаалууд дээр фракциудын тэнцвэрийн харьцааг хангасан хуваарилалт хийж чадахгүй бол УИХ-дахь 68-ын бүлэг өнгөрсөн хугацааных шиг хоёр хуваагдан бужигнахад маш ойрхон, эмзэг байгаа.

Г.ХОРОЛ