Украины ерөнхийлөгч Володимир Зеленский эрчим хүчний салбарт гарсан томоохон авлигын дуулианы дараа төрийн өмчит компаниудын хяналтыг чангатгах төлөвлөгөөгөө батлав. Украины Үндэсний авлигын эсрэг товчоо болон өөр нэг байгууллага мөрдөн шалгах ажиллагааг эхлүүлсэн.

Хэргийг голчлон төрийн атомын компани болох “Энергоатом”-ын гэрээнүүдтэй холбоотой 100 сая ам.долларын хууль бус төлбөртэй холбон тайлбарлаж байна.

Эдгээр мэдэгдлийн улмаас Зеленский шударга ёсны сайд болон эрчим хүчний сайдыг огцруулах хүсэлт гаргасан. Мөн орон нутгийн хэвлэлд Зеленскийтэй олон жилийн танил нэгэн бизнесмен шалгагдаж байгаа талаар мэдээлжээ. Эдгээр дуулиан Оросын дайралт эрчимжиж, Украины эрчим хүчний байгууламжуудыг онилж байгаа үед гарч байна. Улмаар орон даяар цахилгаан хязгаарлалт үргэлжилж байна. Үүнээс болж Киевийн иргэд ихэд уурлаж, бухимдаж байна.

Германы канцлер Фридрих Мерц Зеленскитэй утсаар ярьж, авлигын эсрэг хүчтэй арга хэмжээ авахыг уриалжээ. Европын бусад удирдагч ч мөн санаа зовнин байр сууриа илэрхийлсэн. Зеленский Баасан гаригт (2025.11.14) ерөнхий сайд Юлия Свириденко нартай төрийн өмчит компаниудад аудит хурдан эхлүүлэх, бүх үр дүнг мөрдөн шалгагчдад хүргүүлэхээр тохиролцсон тухайгаа сошиал орчинд бичжээ.

Ажиглагчдын хэлснээр, Зеленский дотооддоо болон гадаадад нэмэгдэж буй болгоомжлолыг намжаахын тулд төрийн өмчит компаниудад тавих хяналтыг чангатгаж, авлигыг дахин давтахаас сэргийлэх зорилгоо харуулж байна.