Карибын орнуудын хамтын нөхөрлөлийн Нөхөн төлбөрийн комиссын (CARICOM) төлөөлөгчид энэ долоо хоногт Их Британид айлчилж, албаныхантай болон улстөрчидтэй уулзана. Тэд боолчлол, колончлолын түүхэн шударга бус байдал болон  сөрөг нөлөөг нь хэрхэн шийдэх талаар хэлэлцэх юм. Европ 15–19-р зууны хооронд дор хаяж 12.5 сая африк хүнийг хулгайлан авч, хүчээр тээвэрлэж, боол болгон худалдаалсан. Улмаар өдийг хүртэл үргэлжилж буй арьс өнгөөр ялгаварлах үзэл зэрэг сөрөг нөлөөг арилгахын тулд илүү их арга хэмжээ шаардлагатай гэж идэвхтнүүд үздэг. Нөхөн төлбөрийн талаарх уриалгууд дэлхий даяар нэмэгдэж байна. Барбадос, Ямайка зэрэг 15 гишүүнтэй "CARICOM" нь бүрэн уучлалт, боловсролын хөтөлбөр, өрийн дарамтыг цуцлах, мөнгөн нөхөн төлбөр олгох зэрэг багтсан төлөвлөгөөтэй. Африкийн холбоо ч мөн өөрийн төлөвлөгөөг боловсруулж байна.

Гэхдээ нөхөн төлбөрт эсэргүүцэх байр суурь ч нэмэгдсээр байна. Зарим Европын удирдагч энэ талаар ярихыг ч хүсдэггүй. Учир нь одоогийн улс орнууд өнгөрсөн үеийн хийсэн буруу үйлдлийн хариуцлагыг хүлээх ёсгүй гэж үздэг. Жишээлбэл, Их Британийн ерөнхий сайд Киер Стармер 2024 онд Самоад болсон Бритиш Нийгэмлэгийн дээд хэмжээний уулзалтын өмнө өнгөрсөнтэй холбоотой “урт, дуусашгүй хэлэлцүүлгүүд”-д оролцохын оронд ирээдүйд төвлөрөхийг илүүд үзнэ гэж хэлсэн. Гэхдээ уулзалтын төгсгөлд 56 улсын тэргүүлэгч энэ асуудлаар хэлэлцэх цаг болсон гэдэгт санал нэгдсэн.

"CARICOM"-ын комиссын айлчлал арваннэгдүгээр сарын 17–20-нд болно. Тэд хамтын ажиллагааг бэхжүүлж, нөхөн төлбөрийн асуудлаар олон нийтийн боловсрол, оролцоог нэмэгдүүлэхийг зорьж буйгаа мэдэгдэлдээ дурджээ.

2025 онд "The Repair Campaign" байгууллагаас явуулсан санал асуулгаар боолчлол, колоничлолд гүйцэтгэсэн Их Британийн үүргийн талаар олон нийт төдийлөн мэдлэггүй байгааг харуулсан. Судалгаанд оролцогчдын 85 хувь нь Их Британи гурван сая гаруй африкийг Карибын бүс рүү хүчээр тээвэрлэж байсан гэдгийг мэддэггүй байжээ.