Трансжендер хүмүүсийг АНУ-ын армид алба хаахыг хориглосон зарлигийг ерөнхийлөгч Дональд Трамп энэ оны эхээр гаргасан билээ. Тэгвэл энэхүү зарлигийн дагуу халагдсан Агаарын цэргийн хүчний 17 трансжендер алба хаагч албадан эрт тэтгэвэрт гаргачихаад тэтгэвэр, тэтгэмжийг нь цуцалсан хэргээр холбооны засгийн газрыг шүүхэд өгч байна.

Тухайн трансжендер алба хаагчид нь АНУ-ын Агаарын цэргийн хүчинд 15-18 жил алба хаасан байжээ. Тэд өмнө нь олгодог байсантай ижил хэмжээтэй тэтгэвэр хүсч байна. Тэтгэврийн оронд тэдэнд нэг удаагийн мөнгөн тэтгэмж санал болгож байгаа аж.

Афганистанд алба хааж байсан Агаарын цэргийн хүчний ахлах түрүүч хэлэхдээ "Арми надад ухрах бус удирдах, тэмцэхийг заасан. Гэтэл тэтгэвэрт гарах эрхийг минь цуцалснаар эдгээр үнэт зүйлс зөвхөн тулааны талбарт л хэрэгждэг гэдгийг харуулж байна" гэжээ.